Almatyda úıleri órtengen «Aqkent» turǵyn úı kesheniniń turǵyndaryna qandaı kómek kórsetiledi

ALMATY. QazAqparat - Almaty ákimdigi qurylys salýshymen birlesip «Aqkent» turǵyn úı kesheni turǵyndaryna páterlerdi qalpyna keltirýde qoldaý kórsetedi, dep habarlaıdy QazAqparat tilshisi.

Almaty ákimdigi 1 tamyzda órt kezinde zardap shekken «Aqkent» turǵyn úı kesheniniń turǵyndary órttiń saldaryn joıý úshin qajetti kómek alatynyn habarlady.

Qala ákimi Erbolat Dosaevtyń tapsyrmasy boıynsha turǵyn úı keshenin salýshy - «Ayt housing Complex» JShS-men kelissózder júrgizildi, onyń qorytyndysy boıynsha mynadaı sheshimder qabyldandy:

- 2 qyrkúıekke deıin «Aqkent» turǵyn úı kesheni páterlerinde elektrmen jabdyqtaýdy qalpyna keltirý;

- qurylys salýshynyń qarjysy esebinen kireberis alańdaryna jóndeý júrgizý;

- qurylys salýshynyń qarjysy esebinen esikter men terezelerdi aýystyrýǵa, qutqarý operatsııasy barysynda tartylǵan balkondardy jóndeýge jumsalatyn shyǵyndardy óteýge;

- páterlerde árleý jumystaryn júrgizý (levkas/qabyrǵalardy, tóbelerdi boıaý (jóndeýden keıingi jumystardy turǵyndar ózderi júrgizedi);

- barlyq jumystardy aıaqtap, turǵyndardyń páterlerge 20 qyrkúıekten keshiktirmeı kirýine ruqsat berý;

- páterlerdi qalpyna keltirý jumystary kezeńinde turǵyndarǵa ýaqytsha turý boıynsha shyǵystardy óteýge nemese TJ jelisi boıynsha sharalar aıasynda turǵyn úı berýge;

- qalanyń qoǵamdyq densaýlyq saqtaý basqarmasy zardap shekkenderge densaýlyǵan qalpyna keltirý boıynsha, onyń ishinde tegin medıtsınalyq kómektiń kepildik berilgen kólemi jáne mindetti medıtsınalyq saqtandyrý júıesi (mamandandyrylǵan emdeý, emdeýge jatqyzý) aıasynda medıtsınalyq kómek kórsetý.

Eske salaıyq, biz buǵan deıin Almatyda 16 qabatty úıde órt tutanǵanyn habarlaǵan edik.

Qyzyl jalyn saǵat 18:46 kezinde oqshaýlanyp, sóndirildi.

Amaly qalmaǵan turǵyndar balalaryn terezeden laqtyrdy.

Zardap shekkenderdiń ishinde 2 júkti áıel bar.

Keıin Almaty qalalyq densaýlyq saqtaý basqarmasy bir adamnyń qaza tapqanyn habarlady.

Órtten zardap shekken turǵyndar tamaq jáne jatyn orynmen qamtamasyz etildi.

Marqum Ásel Bekmuhametovanyń otbasyna qajetti kómek kórsetiledi.

Jerleý rásimi Almaty oblysy Eńbekshiqazaq aýdany Qarajota aýylynda ótedi.

«Aqkent» turǵyn úı keshenin salýshy kompanııa Ásel Bekmuhambetovanyń otbasyna eki bólmeli páter beretin boldy.

Osy órtke qatysty eki qylmystyq is qozǵaldy.