Almatyda úılerge sý qashan beriledi

ALMATY. QazAqparat - Almaty qalasynyń Bostandyq aýdanyndaǵy birqatar úılerdi sýmen jabdyqtaý birneshe saǵat ishinde qalpyna keltiriledi. Bul týraly «Almaty sý» MKK málim etti, dep habarlaıdy QazAqparat tilshisi.

«Ótken túnde dıametri 600 mm bolatyn, 50 jyldan astam ýaqyt boıy paıdalanylyp kele jatqan sý qubyry ýchaskeleriniń birinde shtattan tys jaǵdaı týyndady. Onyń saldaryn qazirgi ýaqytta «Almaty sý» MKK apattyq brıgadasy qajetti tehnıkanyń kómegimen shuǵyl túrde joıýda», - dep habarlady «Almaty sý» kompanııasynan.

Aldyn ala málimetter boıynsha, apatqa qubyrdyń tozýy sebep bolǵan. Ol osydan elý jyl buryn paıdalanýǵa berilgen.

«Almatynyń Bostandyq aýdanyndaǵy birqatar úıdiń eski magıstraldy sý qubyrynyń buzylýyna baılanysty ajyratylǵan sýmen jabdyqtaý jumystary birneshe saǵat ishinde qalpyna keltiriletin bolady. Atalǵan qalalyq sektordaǵy úılerdiń turǵyndarynan ýaqytsha qolaısyzdyqtarǵa túsinistikpen qaraýdy suraımyz», - delingen habarlamada.

Buǵan deıin Almatyda qubyr jarylyp, birqatar kósheni sý basqany týraly jazǵan bolatynbyz.