Almatyda úılerdiń kireberisindegi kameralardy urlap júrgen jigit ustaldy
ALMATY. QazAqparat - Almatyda turǵyn úılerdiń kireberisindegi beınebaqylaý kameralaryn urlaýmen aınalysqan azamat ustaldy. Bul týraly búgin Almaty qalalyq ІІD baspasóz qyzmetinen habarlady.
Esterińizge sala ketelik, bul beınebaqylaý kameralary turǵyn úılerdiń kireberisterine «Qaýipsiz aýla» qalalyq baǵdaralmasy aıasynda ornatylǵan bolatyn.
«Beınebaqylaý kameralarynyń urlanyp jatqany týraly kelip túsken aryzdar negizinde sotqa deıingi tergeý amaldary bastaldy. Jedel-izdestirý sharasy barysynda Almaty qalasynyń Jetisý aýdanynda turatyn 25 jastaǵy M. esimdi azamat ustaldy. Ázirge onyń beınebaqylaý kameralaryn urlaý boıynsha úsh derekke qatysy bar ekendigi anyqtaldy. Aryz berýshi fırma qaskúnemniń keltirgen shyǵynyn - 180 myń teńgege baǵalady. Kúdikti ýaqytsha tergeý abaqtysyna toǵytyldy. Іs sotqa jiberiletin bolady», - dedi Almaty qalasynyń Túrkisib aýdandyq Іshki ister basqarmasynyń bastyǵy, polıtsııa podpolkovnıgi Danııar Mendebaev.
