Almatyda úıinde qarý-jaraq pen esirtki saqtap kelgen azamat ustaldy
Almaty «Esirtki bıznesimen kúres» jobasy aıasynda 44 jastaǵy S. esimdi Túrksib aýdanynyń turǵyny ustaldy. Ol úıinde qarý-jaraq pen esirtki saqtaǵan ári zańsyz esirtki satýmen aınalysqan.
«Jedel derekterge sáıkes, kúdikti esirtki zattaryn, atap aıtqanda, marıhýanany zańsyz satýmen aınalysady. Onyń úıin ruqsat etilgen tintý kezinde, saraıynda áskerı qol granatasyna uqsas zatty, Makarov tapanshasyna uqsas qarýdy, patrondardy, esirtkini qoldanýǵa arnalǵan eki plastık ydysty, ishinde zaty bar shyny talshyqty qapshyq, sondaı-aq oǵan uqsas zaty bar eki polıetılen baılam tabylyp, tárkilendi. Sonymen qatar baqshadan jabaıy ósetin qarasoranyń erekshe ıisi bar jasyl ósimdik zaty salynǵan eki baqsha ydysy tabylyp, tárkilendi», – dedi Almaty qalalyq polıtsııa departamentiniń Esirtki qylmysyna qarsy kúres basqarmasynyń bastyǵy Erlan Álmaǵambetov.
Atalǵan derek sotqa deıingi tergeýdiń biryńǵaı tizilimine QR QK-niń 297-baby (Esirtki, psıhotroptyq zattardy, sol tektesterdi ótkizý maqsatynda zańsyz daıyndaý, qaıta óńdeý, ıemdený, saqtaý, tasymaldaý, jóneltý ne ótkizý) boıynsha tirkeldi.
«Saraptamalar taǵaıyndaldy. QR QPK-niń 201-babyna sáıkes ózge aqparattar tergeý múddesine oraı jarııalaýǵa jatpaıdy. QR Konstıtýtsııasynyń 77-baby 3-tarmaǵynyń 1-tarmaqshasy jáne QR QPK-niń 19-baby 1-bóligine sáıkes, sot úkimimen belgilengenge deıin ár adam qylmystyq quqyq buzýshylyq jasaýda kinásiz dep tanylady», - dep habarlady polıtsııadan.
