Almatyda úıi órtengen otbasylarǵa 280 myń teńge materıaldyq kómek beriledi
ALMATY. QazAqparat - Almatyda órt saldarynan páterinen aırylǵan №31 úıdegi 10 otbasyǵa 280 myń teńge materıaldyq kómek beriledi. Bul týraly Jetisý aýdany ákiminiń orynbasary aıtty, dep habarlaıdy QazAqparat tilshisi.
«Kókjıek» shaǵyn aýdanyndaǵy órtten 19 páter jaramsyz bolyp qaldy.
Onyń ishinde 10 páter tamtyǵy qalmaı órtenip ketse qalǵany jartylaı janǵan. Órtengen páterler memlekettik bıýdjet esebinen qalpyna keltiriletin bolady.
Jetisý aýdany ákiminiń aıtýynsha, ıpotekalyq nesıe tólep otyrǵan turǵyndarǵa jóndeý jumystary saqtandyrý tólemi esebinde qaıtarylatyn bolady.
«Qazir osy maqsatta arnaıy komıssııa quryldy. Órt-tehnıkalyq saraptama jasalyp jatyr. Páteri órtenbegen turǵyndar úılerine kirdi. Eń aldymen úıdiń shatyryn jabýmen aınalysatyn bolamyz. Sebebi, jaýyn jaýsa jaǵdaı qıyndaı túseri sózsiz. Atalǵan is boıynsha aqaý aktisi qurylady. Órtten japa shekken otbasylarǵa zańnamaǵa sáıkes anyqtama berip, áleýmettik qorǵaý organdaryna tirkeıtin bolamyz. Zań boıynsha bizde 50-100 AEK kóleminde, 270-280 myń teńge kóleminde qarajat qarastyrylǵan. Tek qala tarapynan ǵana emes, bıznes ókilderinen de kómek qarastyrylǵan. Eń aldymen tolyq janyp ketken 10 páter qaıta qalpyna keltiriledi. Bir de bir turǵyn kómeksiz qalmaıdy», - dedi aýdan ákiminiń orynbasary Sanjar Toǵaev.
Aıta ketý kerek, kóptegen turǵyndar memleket tarapynan beriletin az ǵana kómekke narazylyq bildirip otyr.
«Barlyq múlik, jıhaz, oıynshyq, kıim-keshek janyp ketti. 270 myńǵa men ne alamyn? Tek 1 tósek qana keledi», - dedi Ásem Súıindikova.
Úıdi qalpyna keltirýge 2 aıdaı ýaqyt ketedi. 4 otbasy qonaqúılerge ýaqytsha ornalastyryldy. Basqalary óz týysqandarynyń úılerine jaıǵasty.
TJD ókilderiniń habarlaýynsha, órttiń shyǵý sebepteri áli anyqtalyp jatyr.
Aıta ketý kerek, Almaty ákimi Baýyrjan Baıbek osyǵan deıin úıi órtengen almatylyqtardyń páterin tez arada qalpyna keltirýdi tapsyrǵan bolatyn.
