Almatyda uıǵyr ádebıetiniń klassıgi, dramatýrg Zııa Sámadıdiń qurmetine eskertkish taqta ashyldy

Qalamgerdiń esimin máńgi este qaldyrý maqsatynda ashylǵan eskertkish taqta onyń sońǵy jyldary turǵan úıine qoıyldy.

Memorıaldyq eskertkish taqtanyń ashylýyna Astana men Almaty qalalarynyń zııaly qaýym ókilderi, qalamgerler, mádenıet qaıratkerleri jáne jazýshynyń týǵan-týystary men ul-qyzdary qatysty.

"Búkil álem mádenıetin álemdik uly muhıtqa teńesek, Qazaqstan mádenıeti sol muhıttyń bir bóligi. Al uıǵyr mádenıeti sol teńizge quıylyp jatqan arnaly ózenderdiń biri. Ol ózen Qazaqstandaǵy uıǵyr ádebıetiniń klassıgi, Qazaqstannyń halyq jazýshysy Zııa Sámadı degen bıik shyńnan bastaý alady. Zııa Sámadı elimizdiń ósip-órkendeýine zor úles qosqan, aıtýly qalamger. Onyń "Maımhan", "Taına godov", "Ǵanı Batýr" romandary, "Іle jaǵasynda", "Bir tartym temeki" jáne taǵy da basqa povesteri men túrli shyǵarmalary búginde jurtshylyǵymyzdyń ıgiligine aınaldy. Elimizdiń maqtanyshy Hızmet Abdýllın, Jamal Bosaqov, Shaıym Shavaev syndy jazýshylar Zııa Samadı esimin pir tutyp ósse, qazirgi ýaqytta Mahmýd Abdrahmanov, Ahmetjan Ashırı, Rahym Rozıev, Abdýǵopar Qutlyqov syndy uıǵyr aqyn-jazýshylary Zııa Samadı jolyn laıyqty jalǵastyryp keledi",-dep atap ótti sharanyń ashylý saltanatynda Qazaqstan Jazýshylar odaǵynyń hatshysy, aqyn Sultan Qalıuly.

Zııa Samadı (1914-2000)- Qazaqstannyń bolashaq damýyn halyqtardyń dostyǵy men úılesimdi kelisiminde kóre bilgen ınternatsıonal jazýshy. Ol Qytaı elinde, aýyl mektebinde muǵalim, gazet qyzmetkeri, keıinnen Shyńjań uıǵyr avtonomııalyq aýdanynda mádenıet mınıstri bolyp qyzmet atqarǵan. Sol aýdanda Jazýshylar odaǵyn quryp, tuńǵysh ret Jazýshylar odaǵynyń sezin ótkizgen bolatyn. Ol aqyndyq óneriniń arqasynda "Raýshan" atty pesasyn jazyp, sheteldik uıǵyrlar drammatýrgııasynyń negizin saldy. Qalamger sonymen qatar, uıǵyr halqynyń bostandyǵy jolyndaǵy kúrestiń basynda júrdi. Sol kúres jaıynda jazýshynyń "Ahmet ápendi" kitabynda keńinen jazylǵan. Asharshylyq kezinde shetel asqan jazýshy keıin alǵashqylardyń qatarynda elge oralǵan edi.

Prozaık sondaı-aq, qazaq-uıǵyr mádenı baılanysyn nyǵaıtý jolynda Sábıt Muqanov pen Ǵabıt Músirepovtyń shyǵarmalaryn sheber tárjimalaǵan. Zııa Ibadatulynyń ádebıetke sińirgen qajyrly eńbegi memleket tarapynan joǵary baǵalanyp, ol "Eńbek Qyzyl Tý" ordenimen marapattaldy jáne qalamgerge "Qazaqstannyń halyq jazýshysy" ataǵy berildi. Búginde Zııa Samadıdiń shyǵarmalary úlken suranysqa ıe.