Almatyda úıge soǵylǵan avtobýstaǵy jolaýshylardyń jaǵdaıy belgili boldy
ALMATY. QazAqparat - Dárigerler Almatyda jol apatynan zardap shekken jeti adamnyń qazirgi jaǵdaıyn aıtty, dep habarlaıdy QazAqparat tilshisi.
Densaýlyq saqtaý basqarmasynyń málimetinshe, 10 qazan kúni jol apatynan zardap shekkender qalalyq jedel járdem aýrýhanasy men №7 qalalyq klınıkalyq aýrýhanaǵa jetkizildi.
«Jol-kólik oqıǵasy saldarynan 7 adam zardap shekti, onyń bireýi kámelet jasyna tolmaǵan bala. Dárigerlerdiń tekserýinen keıin 6 patsıent ambýlatorııalyq emge jiberildi. Qazirgi ýaqytta bir zardap shegýshiniń jaǵdaıy óte aýyr dep baǵalanyp, ol aýrýhananyń anestezıologııa, reanımatsııa jáne qarqyndy terapııa bólimshesinde jatyr. Barlyq qajetti medıtsınalyq kómekti tolyq kólemde alady»,- dep habarlady qalalyq densaýlyq saqtaý basqarmasynyń baspasóz qyzmeti.
Eske salaıyq keshe Almatyda 141-baǵyttaǵy avtobýstyń júrgizýshisi kólikti basqara almaı, jeke turǵyn úıge soǵylǵan bolatyn.
Atalǵan derek boıynsha QR QK 345-babynyń 2-bóliginde kózdelgen qylmys belgileri boıynsha sotqa deıingi tergeý bastaldy.
