Almatyda úıdiń tóbesine soǵylǵan lıftige qyzmet kórsetetin kompanııanyń sertıfıkaty bolmaǵan
Qazaqstan lıftishiler ulttyq qaýymdastyǵynyń sarapshylary men Almaty qalasynyń damý jáne kommýnaldyq ınfraqurylym basqarmasynyń qyzmetkerleri birlesip lıftige tehnıkalyq tekserý júrgizdi.
«Tehnıkalyq tekserý nátıjeleri boıynsha lıft kabınasynyń toqtaı almaı qalýy tejeý mehanızminiń aqaýy saldarynan bolǵany anyqtaldy. Sondaı – aq, mashına úı-jaıyn tekserý kezinde aýa temperatýrasy barlyq ruqsat etilgen normalardan asyp, +45° kórsetken. Bul lıft jabdyqtaryn qaýipsiz paıdalanýǵa teris áser etedi», - dedi Qazaqstan lıftshiler ulttyq qaýymdastyǵynyń prezıdenti Erjan Igibaev.
Tekserý qorytyndysy boıynsha lıftige qyzmet kórsetetin «L.» kompanııasynyń lıftige qyzmet kórsetý jumystaryn júrgizý quqyǵyna ónerkásiptik qaýipsizdik komıteti beretin attestaty men ST-RK 3305-2018 lıftileri boıynsha ulttyq standartqa sáıkestigi týraly kýáligi bolmaǵany anyqtaldy.
«Bul servıstik kompanııanyń qyzmettiń osy túrimen aınalysýǵa, qyzmet kórsetýge shart jasasýǵa quqyǵy joq ekenin bildiredi», - dep túsindirdi spıker.
Qaýymdastyq basshysy atalǵan JShS-nyń Almatynyń taǵy birneshe elıtalyq turǵyn úı kesheniniń lıftilerin kútip ustaýdy qamtamasyz etetinine alańdaýshylyq bildirdi.
Onyń aıtýynsha, tekserý nátıjeleri boıynsha ýákiletti organdar ákimshilik jazalaý sharalaryn qabyldaıdy. Kompanııa basshylyǵy jaýapqa tartylýy múmkin.
«L.» kompanııasy endi lıftilerge qyzmet kórsetý jumystaryn júrgizý quqyǵyna attestat pen ulttyq standartqa sáıkestigi týraly kýálik alýy tıis. Tek sodan keıin ǵana lıftilerge qyzmet kórsetýi tıis. Osylaısha, kompanııa zańnamada kórsetilgen talaptardy oryndaıdy», - dedi Erjan Igibaev.
Sonymen qatar, spıker Almatyda lıftilerge qyzmet kórsetetin 60-qa jýyq kompanııa bar ekenin atap ótti. Alaıda, olardy tekserýde qazir qıyndyqtar bar. Sebebi, 2023 jylǵa deıin elde shaǵyn jáne orta bıznesti tekserýge moratorıı qabyldanǵan.
Ol PIK, MIB, JS tóraǵalary lıftilerge qyzmet kórsetetin kompanııalarmen shart jasaspas buryn, olarda attestattyń bolýy jáne barlyq talaptardyń sáıkestigi turǵysynan tekserýi tıis dep esepteıdi.
«Meniń oıymsha, lıft — qaýipti tehnıkalyq qurylǵy. Bul jerde birinshi orynda qyzmet kórsetetin kompanııanyń kásibıligi jáne onyń tıisti bilikti personaly turýy tıis», - dep málimdedi Igibaev.
Eske salaıyq, Almatyda «Mega Towers» turǵyn úı keshenindegi lıft 25-qabatqa deıin bar jyldamdyqpen kóterilip, úıdiń tóbesine soǵylǵan bolatyn . Saldarynan jas jigit zardap shekken edi.
Foto: kievvlast.com.ua
