Almatyda úı janýarlaryna tegin chıp qoıylýda
ALMATY. QazAqparat - Almatyda 2022-2023 jyldary 15 myń úı janýaryna chıp salynbaq. Bul týraly óńirlik kommýnıkatsııalar qyzmetiniń brıfınginde Almaty qalalyq veterınarlyq qyzmettiń basshysy Ádis Seıdaqmatov aıtty, dep habarlaıdy QazAqparat tilshisi.
«Qazirgi ýaqytta bizdiń mamandar qala aýmaǵynda úı janýarlaryn esepke alý maqsatynda ıtter men mysyqtardy tegin chıptep jatyr. 2022-2023 jyldary 15000 úı janýarlaryn chıpteý josparlanǵan», - dedi vetqyzmettiń ókili.
Spıkerdiń aıtýynsha, janýardy chıpteý degenimiz - janýarlardy (ıt, mysyq) elektrondy sáıkestendirý men janýardyń terisi astyndaǵy mıkrochıptiń ımplantatsııasy. Onda 15 tańbaly biregeı nómir bar, ol janýarmen birge ómir boıy qalady.
«Olardyń sanyn sáıkestendirý jáne esepke alý - qańǵybas janýarlardyń máselesin sheshýge baǵyttalǵan. Olardyń paıda bolýynyń negizgi sebepteri áli kúnge deıin ózdiginen serýenge shyǵý, úı janýarlaryn joǵaltý jáne ustaýdan bas tartý bolyp tabylady. Tabylǵan janýarda chıptiń bolýy ony úıge qaıtarýǵa múmkindik beredi», - dedi spıker.
Sondaı-aq ol qaraýsyz jáne qańǵybas janýarlardyń sanyn retteý maqsatynda qoǵamdyq birlestikter men janýarlardy qorǵaý uıymdary Almaty ákimdigimen birlese jumys júrgizip jatqanyn jetkizdi.
