Almatyda úı janýarlaryna qatysty jańa ereje kúshine endi
ALMATY. QazAqparat – Ońtústik astanada búginen bastap úı janýarlaryn aýlaý, ýaqytsha ustaý, jansyzdandyrý jáne serýendetýdiń jańa erejeleri kúshine endi. Atalǵan erejeni osy jyldyń qańtar aıynda Almaty qalasynyń máslıhaty bekitken bolatyn, dep habarlaıdy QazAqparat tilshisi.
«Jańa erejeler janýarlarǵa qatygezdik kórsetýdiń aldyn alýǵa, olardyń sanyn adamgershilikpen retteýge, qalanyń veterınarlyq-sanıtarlyq qaýipsizdigin qamtamasyz etýge, sondaı-aq úı janýarlaryn ustaý jáne serýendetý tártibin retteýge baǵyttalǵan. Onda «Aýlaý-Zararsyzdandyrý-Vaktsınatsııa-Qaıtarý» (AZVQ) baǵdarlamasy arqyly olardyń sanyn gýmanıstik jolmen retteý, ustaý tártibine qoıylatyn talaptar qarastyrylǵan», – dedi Almaty qalalyq Kásipkerlik jáne ınvestıtsııalar basqarmasynyń basshysy Berik Soltanbaev.
Spıkerdiń sózinshe, 2022 jyldyń naýryz aıyna deıin ustalǵan janýarlardyń ıeleri tabylyp, asyrap alý kelisimderi boıynsha úshinshi tulǵalarǵa berilgenge deıin 3 kún ustalǵanyn, al suraýy joq janýarlar medıkamentozdy uıyqtatýǵa ushyraǵanyn eske saldy.
Endi belgili bir jaǵdaılardy qospaǵanda (eger janýar adamǵa, janýarlarǵa shabýyl jasasa nemese adam ómiri men densaýlyǵyna qaýip tóndirse, emdelmeıtin aýrýmen aýyrsa, onda QR zańnamasynda tyıym salynbaǵan preparattarmen, (evtanazııa) jansyzdandyrylady.
«Osyǵan oraı, qalalyq veterınarlyq qyzmet buralqy ıt pen mysyqty aýlaý qyzmetin jańartty: ýaqytsha ustaý pýnkti hırýrgııalyq qural-jabdyqtarmen jáne veterınarlyq preparattarmen jabdyqtalǵan: ustaý-zararsyzdandyrý-vaktsınatsııa-bosatý (UZVB) jáne operatsııadan keıingi kútim. Sondaı-aq 200 oryndyq qorshaýlary bar modýldik blok ornatyldy»,- deıdi spıker.
Ýaqytsha ustaý pýnktinde janýarlardy tirkeýden, tekserýden, ıesin anyqtaýǵa arnalǵan chıptiń bar-joǵyn skanerden ótkizgennen keıin janýarlardyń sýretteri Instagram jelisindegi @aulau_kyzmeti resmı paraqshasynda jarııalanady.
Suraýy joq janýarlar juqpaly aýrýlarǵa dıagnostıkalyq jáne agressııalyq synaqtardan keıin UZVB protsedýrasynan ótip, bırkalar taǵylyp, burynǵy mekendeý oryndaryna jiberiledi.
Qala turǵyndary osy jasyl bırkalarǵa qarap, janýardyń agressıvti emes jáne aınalasyndaǵylarǵa qaýip tóndirmeıtinin túsinedi.
Berik Soltanbaevtyń aıtýynsha, búginde ustaý-zararsyzdandyrý-vaktsınatsııa-bosatý baǵdarlamasy iske qosylǵannan keıin burynǵy aýlanǵan jerlerge eriktiler men janýarlardy qorǵaý uıymdarynyń baqylaýymen 134 ıt pen 1 mysyq shyǵaryldy.
«Bıyl qańǵybas mysyqtarǵa arnalǵan úıler ornatý boıynsha pılottyq jobany iske qosý josparlanýda. Bul jobanyń maqsaty qajetti málimetterdi alý jáne UZVB baǵdarlamasynan ótken qańǵybas ıtter úshin pıtomnıkterdi ornatýdaǵy yqtımal qıyndyqtardy anyqtaý bolyp tabylady. Úısiz janýarlardy qorǵaý áleýmettik mańyzy bar másele ekenin túsinemiz jáne bul máseleni sheshýge árbir adam qatysa alady. Qolǵa alǵan janýarlar úshin biz jaýaptymyz», - dedi B.Soltanbaev.
Almaty qalasynda úı janýarlaryn ustaý jáne serýendetý tártibi úı janýarlarynyń ıeleri men jaýapty tulǵalardyń jaýapkershiligin retteıtin jańa erejemen aıqyndalady.
Jańa erejede «jaýapty adam» - janýar ıesiniń jazbasha nusqaýy boıynsha janýar ıesiniń quqyqtary men mindetterin atqaratyn adam sııaqty uǵym engizildi.
Osy erejedegi jańashyldyq, úı janýarlaryn qaraýsyz qaldyrýǵa bolmaıdy. Mundaı jaǵdaı týyndaǵan jaǵdaıda úı janýarynyń ıesi nemese jaýapty adam janýardy ýaqytsha ustaýǵa úı janýarlaryna arnalǵan panahanaǵa ornalastyrady nemese úshinshi tulǵalarǵa ýaqytsha ustaýǵa beredi, ne janýardy zoologııalyq qonaqúıge ornalastyrady.
Jaraqat pen zııan keltirmeý úshin ıt ıeleri janýarlaryn jańa erejeniń talaptaryna sáıkes serýendetýleri kerek.
Sondaı-aq, ıttermen kúzetiletin tehnıkalyq qyzmet kórsetý stantsııalary, avtoturaqtar, qoımalar sııaqty óndiris oryndary bar menshik ıeleri men jaýapty tulǵalar janýarlardy tek túngi ýaqytta jáne qorshalǵan aýmaqta bos ustaýǵa mindetti. Kúndizgi ýaqytta ıtterdi qorada nemese qarǵybaýmen ustaýy tıis.
Qazaqstan Respýblıkasynyń janýarlarǵa jaýapkershilikpen qaraý salasyndaǵy belgilengen zańnamasyn buzǵany úshin jaýapkershilik Qazaqstan Respýblıkasy Ákimshilik quqyq buzýshylyq týraly kodeksiniń 407-2-babymen retteledi.
Sondaı-aq belgili bir quqyq buzýshylyq úshin ákimshilik aıyppuldar salýdy qarastyrady jáne olardyń mólsheri de quqyq buzýshylyqtyń aýyrlyǵyna baılanysty (10-nan 40 AEK-ke deıin). Bir sózben aıtqanda, 1 AEK - 3450 teńge.
Jańa erejeler múmkindigi shekteýli (kórý qabileti nashar) jandardyń jolserik ıtterdi ustaýyn da nazarǵa alǵan, olar saýda oryndarynda, óndiristik zaldarda jáne úı-jaılarda ıelerimen júrýlerine kedergi joq.
«Ákimshilik aıyppuldar bos júrgen ıtter tistegen adamdardyń densaýlyǵyn óteı almaıtynyn árqaısymyz jaqsy túsinemiz. Sondyqtan, úı janýarlary bar qala turǵyndarynyń esine salǵym keledi – «Sizder olar úshin jaýaptysyzdar, sondyqtan úı janýarlaryńyzdyń táýliktiń kez kelgen ýaqytynda basqalar úshin qaýipsiz bolýy úshin barlyq qajetti sharalardy qabyldaýyńyz kerek», - dep túıindedi Berik Soltanbaev.
Eske sala keteıik, 2021 jylǵy 30 jeltoqsanda Memleket basshysy «Janýarlarǵa jaýapkershilikpen qaraý týraly» Qazaqstan Respýblıkasynyń Zańyn qabyldaǵan bolatyn, ol janýarlardy qorǵaý, olardyń qaýipsizdigin qamtamasyz etý, janýarlarǵa qaraýda adamgershilikti nyǵaıtý jáne janýarlarmen qarym-qatynas jasaý kezinde qoǵamnyń adamgershilik qaǵıdattaryn saqtaý, sondaı-aq janýarlardy ustaý kezinde jeke jáne zańdy tulǵalardyń quqyqtary men zańdy múddelerin qorǵaýdy retteıdi.
