Almatyda úı janýarlaryn jappaı egý bastaldy
ALMATY. QazAqparat - Almatyda 1 aqpannan bastap úı janýarlary men mal basyn dárileý jumystary bastaldy, dep habarlaıdy QazAqparat tilshisi.
Almaty qalalyq veterınarlyq qyzmeti aqpanda 2,7 myń bas iri qara, 1,5 myń bas usaq mal, 250 bas shoshqaǵa aýsylǵa qarsy egý jasalsa, 2,7 myń bas iri qara men 17 bas túıege týberkýlezge allergııalyq reaktsııa boıynsha dıagnostıkalyq zertteý jasalady.
Al qaladaǵy 45 myńǵa jýyq ıt-mysyqqa et qorektiler ehınokokkozyna qarsy óńdeý aıasynda degelmıntızatsııa júrgiziledi.
Naýryz aıynda 2,7 myń bas usaq malǵa pasterellezge qarsy, 1 myń bas iri qaraǵa qarasanǵa qarsy egý jumystary bastalady. Sonymen qatar 710 bas iri qara, 379 bas usaq malǵa, 100 bas ıt-mysyqqa brýtsellezge qarsy, 15 qoshqarǵa juqpaly epıdıdımıtke qarsy dıagnostıkalyq zertteýler júrgiziletin bolady.
«Qalalyq veterınarııa qyzmeti» KMK qala turǵyndarynan jáne mal ıelerinen osy jumystar kezinde veterınar dárigerlerge járdemdesýin surap otyr.
Bul jumystardyń barlyǵy tegin júrgiziledi.
