Almatyda úı janýarlaryn tegin chıpteý baǵdarlamasy iske qosyldy
ALMATY. QazAqparat - Megapolıstegi qańǵybas janýarlardyń sanyn izgilikti túrde retteýdiń 2021-2024 jyldarǵa arnalǵan baǵdarlamasynyń sheńberinde Almaty qalasynyń ákimdigi úı mysyqtary men ıtterin tegin chıpteý baǵdarlamasyn qaıta iske qosty, dep habarlaıdy QazAqparat tilshisi.
Almaty ákimdiginiń málimetinshe, 2022 jyly qalada 15 myń úı janýaryn qamtý josparda. Chıpteý rásimin sharýashylyq júrgizý quqyǵyndaǵy «Qalalyq veterınarııalyq qyzmeti» kommýnaldyq memlekettik kásipornynyń veterınarııalyq dárigerleri júrgizedi.
Janýarlardyń ıelerine qolaıly jaǵdaı jasaý maqsatynda veterınarııalyq qyzmet jeke sektordyń ár aýlasyn aralap júrip qaraýdy jáne aýdan ákimdikterimen birlesip chıpteý boıynsha kóshpeli brıgadalardyń jumysyn uıymdastyrýdy josparlap otyr.
Almaty qalasynyń kez kelgen turǵyny veterınarııalyq qyzmettiń Sall-ortalyǵyna, telefony +7 708 595 6401, tapsyrys bere otyryp, óziniń úı janýaryn chıpteýdi júrgize alady. Itter men mysyqtardy chıpteýdiń shekteýli jasy 2 aı.
Chıpteý – bul biregeı 15 tańbaly nómiri bar janýarlardyń (ıtterdiń, mysyqtardyń) mıkrochıpin ımplantatsııalaý bolyp tabylatyn elektrondyq birdeılendirý. Janýar jáne onyń ıesi týraly barlyq aqparat (biregeı kod) «Pet Control» qalalyq derekter qoryna engiziledi. Baǵdarlama qaladaǵy janýarlardyń esebin durys júrgizý jáne joǵalyp ketken úı janýarynyń ıelerin jedel izdestirý úshin qajet.
Budan basqa, chıpteý rásimi úısiz janýarlar sanynyń ósýine qarsy kúres júrgizýdiń eń tıimdi sharasy. Qańǵybas janýarlardyń sanyna áser etetin jaıttardyń qataryna ıeleriniń tarapynan bolatyn jaýapsyzdyq, olardy baqylaýsyz ósirý, azyq bazasyn izdestirý maqsatynda qańǵybas janýarlardy Almaty oblysynyń aýmaǵynan kóshirý jatady.
Eske salaıyq, QR 2021 jylǵy 30 jeltoqsandaǵy «Janýarlarǵa jaýapkershilikpen qaraý týraly» Zańyna sáıkes, respýblıkada úı janýarlaryn chıpteý 2023 jyldyń 1 qyrkúıeginen bastap, mindetti.
Osyǵan deıin Almatyda ýchaskelik ınspektorlar sany kóbeıetinin jazǵan edik.
