Almatyda úı tonaýmen aınalysqan qylmystyq top ustaldy
ALMATY. QazAqparat- Almatyda úı tonaý qylmysynyń beti ashyldy. Tártip saqshylary bir top páter urylaryn ustady dep habarlaıdy QazAqparat tilshisi.
Polıtseıler Almatynyń «Dorojnık» yqshamaýdanynda qylmystyq topty áshkereleý úshin arnaıy operatsııa ótkizdi. Olar páterdi tonap, shyǵyp kele jatqan bes adamdy ustady.
«Urylar qylmys ústinde ustaldy, ıaǵnı kezekti páter tonaý kezinde. Sondaı-aq, olardyń birneshe saǵat buryn Túrksib aýdanynda ornalasqan eki jeke úıdi tonaǵany belgili boldy. Kúdiktiler aqsha, qundyz ton men zerigerlik buıymdardy urlaýmen aınalysqan. Ustaý kezinde olardan joǵaryda atalǵan zattar tárkilendi. Kúdiktiler qylmystyq jolmen tapqan oljasyn «Volkswagen» kóligine salyp otyrǵan»,-deıdi Almaty qalalyq krımınaldyq polıtsııa basqarmasynyń bastyǵy Janbolat Zıadın.
Kúdiktiler - Almaty oblysynyń turǵyndary. Toptyń eń úlkeni - 34 jasta, eń kishisi - 29 jasta. Bes adamnyń tórteýi qaraqshylyq, tonaý, bireýdiń múlkin urlaý jáne tóbeles kezinde ólimge ákelip soqtyrǵany úshin buryn sottalǵan.
«Olardyń bári buryn isti bolǵan azamattar. Sonymen qatar, olar jerles bolyp shyqty. Olardyń megapolıste qansha ýaqyttan beri júrgenin jáne osyǵan uqsas basqa da qylmystarǵa qatysy bar-joǵyn jaqyn arada anyqtaımyz»,-dedi Janbolat Zıadın.
