Almatyda ushqaly turǵan reısten Ózbekstan azamaty túsirildi
NUR-SULTAN. QazAqparat – Kólik polıtseıleri «Almaty-Tashkent» baǵytyndaǵy ushaq bortynan masań kúıde bolǵan Ózbekstan azamatyn túsirip aldy, dep habarlaıdy QazAqparat.
«14 naýryz kúni Almaty qalasy áýejaıyndaǵy Jelilik polıtsııa bólimine ushýǵa daıyndalyp turǵan «Almaty-Tashkent» baǵytyndaǵy ushaq bortynda quqyq buzýshy bar ekendigi týraly habarlama túsken. Tekserý barysynda kólik polıtseıleri áýe kompanııasy qyzmetkerleriniń eskertýlerine qulaq aspaı, balaǵat sózder aıtyp, jolaýshylardyń tynyshtyǵyna kedergi keltirgen Ózbekstan Respýblıkasynyń 36 jastaǵy azamatyn anyqtady. Mán-jaıdy anyqtaý úshin masań kúıdegi azamat atalǵan áýe reısinen túsirildi», - delingen QR ІІM Kóliktegi polıtsııa departamentiniń baspasóz qyzmeti taratqan aqparatta.
Medıtsınalyq kýálandyrý qorytyndysyna sáıkes, shetel azamaty «ortasha dárejedegi» alkogoldik masań kúıde bolǵany anyqtalǵan.
«Quqyq buzýshyǵa qatysty alkogoldik ishimdikterdi ishý nemese qoǵamdyq oryndarǵa masań kúıde kelý faktisi boıynsha ákimshilik hattama toltyrylyp, 5 aılyq eseptik kórsetkish kóleminde, ıaǵnı 13 255 teńge aıyppul salyndy. Sondaı-aq, atalǵan azamatqa qatysty usaq buzaqylyq boıynsha da ákimshilik hattama toltyryldy. Qazirgi ýaqytta materıal Almaty qalasynyń mamandandyrylǵan aýdanaralyq ákimshilik sotyna joldandy», - delingen baspasóz habarlamasynda.
Aǵymdaǵy jyldyń basynan beri elimizdiń kólik polıtseıleri túrli quqyq buzýshylyqtar úshin 12 601 azamatty ákimshilik jaýapkershilikke tartqan. Onyń ishinde alkogoldik ishimdik ishken nemese qoǵamdyq oryndarǵa masań kúıde kelgender sany – 1326.
