Almatyda úshinshi temirjol vokzaly salynýy múmkin
ALMATY. QazAqparat – Megapolıste Almaty-3 temirjol vokzalyn salý josparlanyp otyr. Bul týraly Almatynyń Bas josparyn túzetýdi talqylaý barysynda «Almatygıprogor-1» kompanııasy bas dırektorynyń orynbasary Altaı Satybaldıev málim etti, dep habarlaıdy QazAqparat tilshisi.
Bas josparǵa sáıkes, Almaty aglomeratsııasyn damytý boıynsha birqatar jobalardy aýqymdy iske asyrý josparlanǵan, onyń ishinde:
- Almaty-1 jáne Almaty-2 jelisi boıynsha ekinshi joldardy salý;
- Almaty-3 vokzalynyń qurylysy;
- Almaty-1 - Talǵar júk-jolaýshylar temirjol jelisiniń qurylysy;
- Almaty-Uzynaǵash tramvaı jelisiniń qurylysy.
Altaı Satybaldıevtyń aıtýynsha, Almaty-3 vokzalynyń qurylysyn buǵan deıin «Qazaqstan temir joly» kompanııasy usynǵan bolatyn. Bul ulttyq kompanııa úshin qosymsha stantsııa júk aǵynyn túsirý úshin qajet.
«Bul qurylys jolaýshylar tasymaly úshin de mańyzdy. Sondyqtan Saın kóshesi ótip jatqan Boraldaı aýmaǵynda magıstraldy joldar salýdy jáne qaladan batys baǵytta Almaty-3 vokzalyn salýdy usynamyz. Onda stantsııa bar, tek vokzal salý kerek. Osylaısha búkil batys aýmaqtar qamtylady»,- dedi ol.
Temirjol torabynyń jalpy uzyndyǵy 69 shaqyrym. Ol torapqa Almaty-1 jáne Almaty-2 stantsııalaryn qosa alǵanda, toǵyz stantsııa kiredi.
Jeltoqsan aıynda Almaty qalalyq josparlaý jáne ýrbanıstıka basqarmasynyń basshysy Almashan Ahmedjanov shahardyń bas josparynyń jobasy qashan aıaqtalatynyn aıtqan bolatyn.
