Almatyda Úshinshi medıaquryltaı ótti
ATY. 12 qarasha. QazAqparat /Erbol Azanbek/ - Qazaqstandyq BAQ-tar básekege qabiletti emes. Bul týraly búgin Almatyda óz jumysyn bastaǵan úshinshi medıaquryltaıda aıtyldy.
Quryltaıdyń ashylýynda aıtylǵandaı Qazaqstandyq baspasóz klýby men ICC Busness Advisors kompanııasy otandyq BAQ-nyń jaǵdaıyn zerttegen. Zertteý kórsetkendeı Qazaqstandyq BAQ-tyń ishki jáne syrtqy naryqta básekege qabilettiligi óte tómen bolyp shyqqan.
«Oǵan BAQ-yndaǵy basqarýdyń, materıaldyq-tehnıkalyq jaǵdaıdyń álsizdigi, jýrnalısterdiń biliktiliginiń tómendigi, quryltaıshylar men jarnama berýshilerdiń redaktsııalyq saıasatqa yqpaly qolbaılaý bolyp otyr»,- deıdi zertteýdi jasaýshylar.
Zertteý aıasynda saýalnamaǵa qatysqandardyń basym bóligi Qazaqstandyq BAQ-nyń Reseılik BAQ-men básekege tótep bere almaıdy dese, 88 paıyzy Qazaqstandyq BAQ Ortalyq Azııada básekege qabiletti dep kórsetken. Quryltaı barysynda osy taqyrypty talqylaǵan sarapshylardyń basym bóligi básekege qabilettilikti arttyrý úshin memlekettik tapsyrysty azaıtý kerek degen pikir aıtty. Óıtkeni qazirgi tańda BAQ-y memlekettik tapsyrys 85 paıyzǵa jetken. Al QR BAM Aqparat jáne muraǵat komıtetiniń tóraǵasy Bolat Bersebaevtyń aıtýynsha memlekettik tapsyrys kerisinshe BAQ-ynyń ómir súrýine qolaıly jaǵdaı týǵyzyp otyr.
«Memlekettik tapsyrys negizinen áleýmettik taqyryptarǵa negizdelgen. Bilim, balalar, jastar syndy jekemenshik BAQ-y bas bura qoımaıtyn taqyryptardyń kóterilýine yqpal jasap otyr. Bunymen qatar Úkimet tarapynan básekege qabilettilikti arttyrýǵa baspasózga jazylý qunyn tómendetý, sandyq telearnany engizý, baspasózdiń ınternetke qol jetkizýi syndy sharalar jasalyp otyr. «Bunyń barlyǵy Qazaqstandyq BAQ-ynyń básekege qabilettiligin artyrýǵa yqpal etedi dep oılaımyn»,- dedi mınıstrlik ókili.
Medıa quryltaı barysynda bunymen qatar Qazaqstandaǵy jarnama naryǵy, Qazaq tildi baspasózdiń jaǵdaıy, Qazaqstandyq baspa men televıdenıeniń ahýaly talqylandy. Qazaqstan baspasóz klýbynyń prezıdenti Ásel Qaraýylovanyń aıtýynsha alǵash ret qos tilde ótken quryltaı qorytyndysynyń jumysy boıynsha usynystar men pikirler jınaqtalyp, QR Baılanys jáne aqparat mınıstrligine jiberiletin boldy.
QR BAM Aqparat jáne muraǵat komıtetiniń tóraǵasy Bolat Bersebaevtyń aıtýynsha quryltaıda qundy pikirler men usynystar kóp boldy. «Bul quryltaıdyń nátıjesi óte paıdaly bolady dep oılaımyn. Usynystar men pikirlerge tolyqqany zertteýler júrgizip, birneshe sharalar daıyndaımyz. Bul máseleler boıynsha aldaǵy ýaqytta arnaıy úılemtirýshi keńes te qurylady»,- dedi ol.
