Almatyda úshem dúnıege keldi

ALMATY. QazAqparat - Almatyda ekstrakorporaldy uryqtandyrý arqyly úshem dúnıege keldi. Jarkentten kelgen jas otbasy eki qyz ben bir uldyń ata-anasy atandy. Bul týraly Medıtsınalyq saqtandyrý qory Almaty qalalyq fılıalynyń baspasóz qyzmeti málim etti, dep habarlaıdy QazAqparat tilshisi.

29 jastaǵy Gýnchıgúl jubaıy ekeýi - birneshe jyldan beri bir perzentke zar bolǵan otbasylardyń biri. Aıtýynsha, mundaı baqytqa kenelem dep eshqashan oılamapty.

«Turmys qurǵaly beri 4 jyl boıy bala kótere almadym. Barmaǵan jerim, baspaǵan taýym qalǵan joq. Em-dom esh nátıje bermegen soń ana bolýdan tipti kúderimdi úze bastadym», - dep eske alady ol.

Aıtýynsha, dárigerler densaýlyǵyna baılanysty oǵan «bedeýlik» degen dıagnoz qoıǵan. Biraq jaqsylyqtan úmit úzbeı, bilikti dáriger izdeýdi toqtatpaǵan.

Sóıtip Almatydaǵy Reprodýktıvti medıtsına ortalyǵyna kelgen.

«Sol kezde EKO-ny mindetti áleýmettik medıtsınalyq saqtandyrý arqyly jasatýǵa bolatynyn estip, qatty qýandym. Sebebi EKO óte qymbat, ony ekiniń biriniń qaltasy kótere bermeıdi. Bul men úshin de aqyrǵy múmkindik boldy. Sol sebepti emhanadaǵy dárigerge baryp kezekke turyp, qarala bastadym. Álbette, men sııaqtylar óte kóp, sondyqtan kezek kútýge týra keldi. Men shydamdylyq tanytyp, kúttim. Sońynda úlken baqytqa keneldik. Ómirge eki qyz, bir ul bala ákeldim», - deıdi úshemniń anasy.

Esterińizge sala ketsek, baǵasy qymbat qyzmetterdiń biri- ekstrakorporaldy uryqtandyrý 2020 jyldan beri qaraı mindetti áleýmettik medıtsınalyq saqtandyrý arqyly qarjylandyrylyp keledi.

2022 jyldyń birinshi jartysynda osyndaı 1304 jup EKO jasatqan. Oǵan saqtandyrý esebinen 1,3 mlrd teńge bólindi.