Almatyda ushaq apatynan aman qalǵan 3 sábıdiń ata-anasy qaıda
ALMATY. QazAqparat – Almaty mańyndaǵy ushaq apatynan 4-5, 8 jáne 9 aılyq úsh sábı zardap shekken, dep habarlaıdy QazAqparat tilshisi.
Áleýmettik jelide qutqarýshylardyń 4-5 aılyq náresteni qıraǵan salonnan alyp shyqqany týraly vıdeo tarady. Vıdeo kópshiliktiń kóńilin bosatty.
Kórer jaryǵy bar balanyń ata-anasy tiri me, joq pa? Osy saýal kópshiliktiń kókeıinde tur.
Qalalyq qoǵamdyq densaýlyq saqtaý basqarmasynyń taratqan málimetine sáıkes, aýrýhanaǵa bir jasqa deıingi 3 bala túsken. Dárigerler úsheýiniń de ata-anasy tiri ekenin aıtty.
Biraq olardyń árqaısysy ár aýrýhanaǵa jetkizilgen.
Shamamen 4-5 aılyq náresteniń aty – Asylym Aqbolatqyzy.
Qyz balanyń mıy jaraqattanyp, soqqy alǵan. Balanyń eńbegi urylyp, syrylǵan. Dárigerler balanyń jaǵdaıyn birqalypty aýyr dep baǵalap otyr.
Sábıdiń ata-anasy Almaty oblystyq kópsalaly aýrýhanasynda jatyr.
Anasy 28 jastaǵy Sáttigúl Úsenge jaraqattan keıingi pnevmotoraks dıagnozy qoıylǵan. Oń jaq san súıegi, jambas súıegi jáne oń jaqtaǵy 9-shy qabyrǵasy synǵan. Qazir jaǵdaıy birqalypty.
Asylymnyń ákesi 32 jastaǵy Davaa Aqbolat mı jaraqatymen aýrýhanaǵa tústi. Onyń da jaǵdaıyn dárigerler birqalypty dep baǵalap otyr.
Ushaq apatynan 8 aılyq Quralbaı Dámeli de zardap shekti.
Bala qosarly jaraqatpen túsken, mıy jaraqat alǵan, mıy shaıqalǵan. Іshi, ishki organdary soqqy alǵan. Jaǵdaıy aýyr.
Onyń ákesi - 39 jastaǵy Nurlan Tólebaev №4 aýrýhanada jatyr. Jabyq mı jaraqatymen túsken. Mıy shaıqalyp, keýde tusy soǵylǵan. Jaǵdaıy óte aýyr.
9 aılyq Ǵatıat Ádiljan Maqsutuly mı jaraqatymen túsken. Іshi, ishki organdary soqqy alǵan. Jaǵdaıy birqalypty.
Al onyń ákesi 27 jastaǵy Ǵatıat Maqsut Bolatqanuly bas jaraqatymen shuǵyl medıtsınalyq qyzmet kórsetý aýrýhanasyna jatqyzyldy. Ázirge balanyń anasy týraly aqparat joq.
Barlyq búldirshinder qalalyq balalarǵa shuǵyl medıtsınalyq kómek kórsetý ortalyǵyna jatyr.
«Bizge 9 bala jetkizildi. Olardyń úsheýi - bir jasqa deıingi balalar. 3 bala bólimshede jatyr. Qalǵan 6 bala - jansaqtaý bóliminde. San súıegi synǵan eki balaǵa ota jasaldy. Jaǵdaıy birqalypty. Ómirine esh qaýip tónip turǵan joq. Barlyq medıtsınalyq preparattar jetkilikti. Balalardyń ata-anasy aman dep estidik. Týystary kelip balalardy kórip ketti», - dedi ortalyqtyń bas dárigeri Abaı Qusaıynov.
