Almatyda úsh jigit túngi drıft úshin jazalandy
ALMATY. QazAqparat – Almatyda janarmaı beketinde drıft jasaǵan úsh jigit jaýapqa tartyldy, dep habarlaıdy QazAqparat tilshisi.
Almaty qalalyq PD baspasóz qyzmetiniń habarlaýynsha, áleýmettik jelilerdi baqylaý barysynda jastardyń jınalyp alyp drıft jasaǵany anyqtaldy. Olardyń bul áreketteri zańsyz bolyp tabylady. Sondaı-aq, olar turǵyndardyń narazylyǵyn týdyrdy.
«Beınejazbany zerttep, biz qatysýshylardy ákimshilik jaýapkershilikke tarttyq. Keıbir jastardyń kólik júrgizýdi jáne ekstremaldy bolýdy qalaıtyny túsinikti. Bul áreketteri eshqandaı jaǵdaıda QR zańdaryna qaıshy kelmeýi kerek. Sonymen qatar, áreket arnaıy bólingen jerde emes, adamdar kóp bolatyn janarmaı beketiniń aýmaǵynda ótti. Júrgizýshi óziniń kóliginiń eptiligi jáne drıftimen kópshiliktiń nazaryn aýdarǵysy keldi. Alaıda, quqyq buzýshy durys bolmaǵan jaǵdaıda onyń saldary qandaı bolatynyn eskermeıdi. Mysaly, eger drıft kezinde avtokólik adamdar turǵan baǵytqa qaraı qozǵalyp ketse nemese kólik qozǵaltqyshtyń qyzyp ketýine baılanysty órtense, onyń ústine janarmaı beketinde. Dóńgelektiń astynan ushqan tas ta bireýdiń kózine túsýi múmkin, al bul asfalt betine de zaqym keltiredi, osynyń ózi ákimshilik quqyq buzýshylyq bolyp sanalady, – dedi Almaty qalalyq PD jergilikti polıtsııa qyzmeti basqarmasynyń basshysy Manap Sattarov.
Sonymen 1997 jyly týǵan Sh., 1999 jylǵy M. jáne 1997 jylǵy Ch. esimdi jigitter QR Ákimshilik quqyq buzýshylyq týraly kodeksiniń 630-baby 1- bólimine (joldardy, temirjol ótpelerin jáne basqa jol qurylystaryn búldirý ) sáıkes jaýapkershilikke tartyldy. Jol erejesin qatań saqtaý týraly jastarmen túsindirý áńgimesi ótkizildi. Bul aımaq erekshe baqylaýǵa alyndy.
Aıta keteıik, Almatyda túnde saýyq-saıran qurǵan jastardyń vıdeosy kris_p_almaty Instagram paraqshasynda paıda boldy. Onda jastardyń arnaıy kostıýmder kıip alyp bılep júrgenderin de kórýge bolady.
