Almatyda úsh jigit kólikterdiń katalızatoryn urlap kelgen
ALMATY. QazAqparat - Almatyda kólikterdiń katalızatoryn urlaǵan 1998, 1999 jáne 2000 jyly týǵan azamattar ustaldy, dep habarlaıdy QazAqparat tilshisi.Urylardyń aqyrǵy isi 5 maýsymda Medeý aýdanynda tirkeldi.
«Úı aýlasynda kúdiktiler «Toıota Prado» avtokóliginen katalızatory bar sóndirgishti tolyq sheship, alyp ketken. Sonymen 500 myń teńge kóleminde materıaldyq shyǵyn keltirdi. Jedel-izdestirý is-sharalary barysynda sol kúni kúdiktiler ustaldy. Olardan bólshekterdi kesýge arnalǵan arnaıy quraldar tárkilendi. Bul derek sotqa deıingi tergeýdiń biryńǵaı tizilimine Qylmystyq kodekstiń 188-baby 2-bóligi boıynsha tirkeldi. Ustalǵandar óz kinálaryn moıyndap, ýaqytsha ustaý ızolıatoryna qamaldy. Olardyń Túrksib, Bostandyq, Áýezov aýdandarynda osyǵan uqsas 9 epızodqa qatysy bar ekeni dáleldendi. «Toıota Prado» kóliginiń katalızatory tárkilenip, qylmystyq iske qosyldy», - dedi qalalyq polıtsııa departamenti krımınaldyq polıtsııa basqarmasynyń bastyǵy, polıtsııa polkovnıgi Qýatbek Naýatov.
Sondaı-aq ol katalızatorlardy qabyldaýshy bolyp jumys isteıtin satyp alýshynyń ustalǵanyn málimdedi.
«Ol kólikterdiń katalızatorlaryn bólshektelgen kúıde alǵanyn, keıin metaldyń quramy men qunyn anyqtaıtyn arnaıy analızator arqyly baǵalaý júrgizgenin aıtty. Osydan soń katalızatorlardy tapsyrýshy adamǵa akt toltyrylyp, katalızatorlardy ary qaraı zaýytqa satý úshin daıyndaǵan. Qazirgi ýaqytta jedel-izdestirý, tergeý sharalary júrgizilýde», - dedi polıtsııa polkovnıgi.
Eske salaıyq, buǵan deıin Almatyda 78 adam ómir boıyna júrgizýshi kýáliginen aıyrylǵanyn habarlaǵan bolatynbyz.
