Almatyda úsh jigit kınoteatrda 20 jastaǵy qyzdy zorlady degen kúdikke ilindi

ALMATY. QazAqparat - Almatyda úsh er adam megapolıstegi kınoteatrlardyń birinde 20 jastaǵy qyzdy zorlaǵan. Bul týraly aqparat «Ne molchı» qoǵamdyq uıymynyń áleýmettik jelidegi akkaýnttarynda jarııalandy, dep habarlaıdy QazAqparat tilshisi.

Almaty qalasynyń polıtsııa departamenti atalǵan qylmysqa qatysty pikir bildirdi. Vedomstvo aqparatynsha, qazir jan-jaqty tergeý jumysy júrip jatyr.

2002 jyly týǵan Q. atty boıjetkenniń aryzy QR Qylmystyq kodekstiń 120-babymen sotqa deıingi tergep-tekserýdiń biryńǵaı tizimine tirkelgen.

Іs júrgizý aıasynda sot-medıtsınalyq saraptama taǵaıyndaldy.

Qazirgi ýaqytta Qazaqstannyń qylmystyq is júrgizý kodeksiniń 24-baby talabyna saı sotqa deıingi tergeý istiń mán-jaıyn jan-jaqty, tolyq jáne obektıvti zertteýge baǵyttalǵan.

«Sonymen qatar osy kodekstiń 201-babyna sáıkes tergeý múddesi úshin ózge aqparat jarııalanbaıdy. QR Konstıtýtsııasynyń 77-baby 3-tarmaǵynyń 1-tarmaqshasyna jáne Qylmystyq is júrgizý kodeksi 19-baby 1-bóligine sáıkes, adamnyń kinási zańdy kúshine engen sot úkimimen dáleldenip, belgilengenge deıin kúdiktiler kinásiz dep esepteledi», – dep habarlady Almaty qalasy polıtsııa departamentiniń baspasóz qyzmetinen.