Almatyda úsh jastaǵy balanyń asqazanynan batareıa otasyz alyndy
ALMATY. QazAqparat - Almatylyq dárigerler úsh jasar bala jutyp qoıǵan batareıany otasyz aldy, dep habarlaıdy QazAqparat tilshisi Almaty qalalyq qoǵamdyq densaýlyq saqtaý basqarmasyna silteme jasap.
Vedomstvonyń málimetinshe, balanyń ata-anasy Almaty qalalyq Balalar jedel medıtsınalyq kómek kórsetý ortalyǵyna júgingen. Sábıdiń anasy balasynyń qolyndaǵy shynashaqtaı batareıany kenet aýzyna salyp, jutyp qoıǵanyn aıtqan.
«FGDS zertteýi bógde zattyń baryn kórsetti - asqazannyń tómengi jaǵynda shynashaqtaı kishkene batareıka tabyldy. Balalar jedel járdem bóliminiń dárigerleri balanyń denesinen qaýipti zatty shyǵarýdy dereý qolǵa aldy. Sebebi, batareıany jutqan soń, qabyný protsesi birneshe saǵat ishinde bastalady. Bul asqazannyń nemese óńeshtiń shyryshty qabyǵynyń kúıip ketýine, tipti osy organdardyń perforatsııasyna ákelýi ábden múmkin»,-dep habarlady qalalyq qoǵamdyq densaýlyq saqtaý basqarmasynda.
«Batareıany shyǵarý kezinde ol qaıta-qaıta óńeshtiń joǵarǵy úshten bir bóliginen, dál joǵarǵy fızıologııalyq tarylý aımaǵynda syrǵyp kete berdi. Sodan biz batareıany joǵarǵy úshten bir bólikke jetkizip, onyń artyna Foleı kateterin qoıýdy sheshtik. Batareıa Dormııa kárzeńkesiniń (endoskopııalyq protsedýralar kezinde qýystaǵy tastar men túrli bógde denelerdi alyp tastaýǵa arnalǵan qural) kómegimen alyndy. Sodan keıin Foleı kateteri úrlenip, endoskoptyq tútik jáne bógde deneni ustap alǵan Dormııa sebetimen birge asqazan men óńeshten sátti shyǵaryldy», - dedi Almaty Balalar shuǵyl medıtsınalyq kómek kórsetý ortalyǵynyń hırýrg-endoskopıst dárigeri Murat Dúısebaev.
Osyǵan oraı, hırýrgııalyq ota jasaýdyń qajeti bolmaǵan.
«Jyl basynan beri Balalar shuǵyl medıtsınalyq kómek kórsetý ortalyǵyna asqazan-ishek joldarynda bóten zat bar 125 bala, tynys joldarynda bóten zat bar 32 bala túsken. Kóbinese balalar tıyn, batareıa, kishkentaı oıynshyqtardy jutady. Ókpede dárigerler negizinen jerjańǵaq, tuqym, grek jańǵaǵy, qalam qaqpaǵyn tabady»,- dep habarlady vedomstvoda.
Joǵaryda atalǵan jaǵdaıǵa baılanysty dárigerler ata-analardan kishkentaı balalaryna muqııat qaraýdy, olardyń oınaıtyn zattaryna nazar aýdarýdy surady.
