Almatyda úsh skverde qaıta qalpyna keltirý jumystary aıaqtaldy

Atalǵan jobalar «Bıznestiń jol kartasy 2020» baǵdarlamasy aıasynda júzege asyryldy, dep habarlaıdy QazAqparat tilshisi.

Atap aıtqanda, Áýezov aýdanynyń 12-shi shaǵynaýdanyndaǵy saıabaq aýmaǵynda syrtqy jaryqtandyrýdyń 50 qurylǵysy ornatylyp, aýmaqqa gazon otyrǵyzyldy.

Almaly aýdanynda ornalasqan Maqataev atyndaǵy saıabaq aýmaǵy 4,8 myń sharshy metr bolatyn ýchaskeni kógaldandyrý boıynsha jumystar júrgizildi. «Mahabbat» skveri de Almaly aýdanynyń aýmaǵynda ornalasqan, munda da osyǵan uqsas jumystar aıaqtaldy.

Jalpy, qala turǵyndarynyń qolaıly demalysy úshin qajetti jaǵdaıdy jasaı otyryp, atalǵan jobalardy júzege asyrý qalanyń ınfraqurylymyn jaqsartýǵa múmkindik beredi.

«Saıabaq - shyǵarmashylyq ıntellıgentsııany, jas aqyndar jáne jazýshylardy tartatyn orynǵa aınalýy tıis. Osy orynnyń atmosferasy shyǵarmashylyqqa shabyttandyratyndaı jaǵdaı jasalýy kerek degen mindet qoıdym»,- degen bolatyn Almaty qalasynyń ákimi Baqytjan Saǵyntaev.

Sonymen birge, atalǵan jobalar jumys oryndarynyń qurylýyn qarastyrady. Megapolıste «Jumyspen qamtýdyń jol kartasy» baǵdarlamasy boıynsha ınfraqurylymdyq 214 jobany júzege asyrý úshin 26 myń jańa jumys ornyn qurý josparlanýda. Sol arqyly qyzmetkerlerdiń keminde 50 paıyzyn halyqty Jumyspen qamtý ortalyqtary arqyly qamtamasyz etý kózdelgen.