Almatyda úsh mekteptiń qurylysy qarqyndy júrip jatyr
ALMATY. QazAqparat – Almaty ákimi Baqytjan Saǵyntaev Medeý aýdanynyń turǵyndarymen kezdesti, dep habarlaıdy QazAqparat tilshisi.
Kezdesý ádetegideı «erkin mıkrofon» qaǵıdatymen ótti. Bul - aýdan turǵyndarymen ekinshi ret júzdesý tsıkly, munda shaǵymdar tyńdalady jáne tıisti sheshimder qabyldanady. Buǵan deıin, qala basshysy Alataý, Naýryzbaı, Túrksib, Jetisý, M.Áýezov aýdandarynyń turǵyndarmyn kezdesken.
Medeý aýdanyndaǵy kezdesýge shamamen 450 adam jınaldy. Birinshi kezdesýge 300-den asa adam qatysyp, 80-ge jýyq másele boıynsha suraq qoıǵan edi. Olardyń qalaı sheshilgeni týraly Medeý aýdanynyń ákimi Sultanbek Mákejanov baıandady.
Abattandyrý men jaryqtandyrý oń sheshimin tabýda. Mysaly, bıyl jyly 19 kóshedegi syrtqy jaryq jelisiniń qurylysy aıaqtaldy, 1 084 sham ornatyldy. Keler jyly Medeý aýdanynda qalǵan 268 kóshe jaryqtanady, 6 200 sham ornatylady, sonymen qatar 27 aýlaǵa 500 jaryq núktesi qoıylady. Bıylǵy jyly 82 aýla abattandyryldy, keler jyly 41 aýlaǵa kúrdeli jáne aǵymdaǵy jóndeý jumystaryn júrgizý josparlanǵan.
Ospanov, Jamaqaev, Sarybaı, Chaplın kóshelerin sý basyp qalý máselesin sheshý úshin Ortalyq mýzeı mańynan uzyndyǵy 5,1 km bolatyn aryq jelisiniń qurylysy aıaqtaldy. 16 kóshe boıynsha uzyndyǵy 22 km bolatyn aryq jelilerin tartý jobasy ázirlenýde. Sonymen qatar, Kishi Almaty ózeniniń jaǵalaýyn Shaqshaq Jánibek kóshesinen Gogol kóshesine deıin abattandyrý josparlanǵan.
Jıi qoıylatyn suraqtardyń biri - Tasty qyrat, Muztaý, Kólsaı, Sulýsaı, Keńsaı eldi mekenderi men Aqqaıyń yqshamaýdanyn sýmen qamtamasyz etý. Tasty qyrat eldi mekenin sýmen qamtamasyz etý júıesin salý keler jyldyń kóktemine josparlanǵan. Kólsaı yqshamaýdanynda da sýmen qamtamasyz etý júıesin salý kóktemde bastalady. Muztaý (Býtakov) eldi mekeni boıynsha da sýmen qamtý jáne sýdy bólý júıesin salý jobasy jasalǵan jáne 2020-2021 jyldary júzege asady. Bul máseleler Sulýsaı, Keńsaı yqshamaýdandarynda da sheshiledi. Barlyq jobalardy iske asyrý barysynda shamamen 7 myń turǵyny bar 2 500 úı aýyz sýmen jáne káriz jelilerimen qamtamasyz etiledi.
«Dýman» yqshamaýdanyndaǵy 57 kósheniń ınjenerlik jelileriniń qurylysy aıaqtalyp qaldy. Munda kósheler kúrdeli jóndeýden ótkiziledi jáne abattandyrylady.
Bıyl uzyndyǵy 78 km bolatyn gaz qubyryn (42 baý-baqsha qaýymdastyǵy, 2 MJD, Muztaý, Alataý yqshamaýdandary jáne Shırokaıa şel, Keńsaı, Tasty qyrat eldi mekenderi) salý aıaqtaldy, ol 2 myńnan astam úıdi qamtıtyn bolady.
Oqýshy ornynyń tapshylyǵyn joıý úshin «Dýman» yqshamaýdanyndaǵy №172 mektep janynan 850 oryndy qosalqy nysan salynyp jatyr. Sondaı-aq «Samal-3» yqshamaýdanynda 800 oryndy mekteptiń qurylysy qarqyndy júrýde. Ormanov kóshesi boıynda jeke ınvestıtsııa esebinen 540 oryndy ámbebap mekteptiń qurylysy jalǵasýda.
Kezdesý barysynda abattandyrý, ınjenerlik jelilerdi jóndeý, kópbalaly otbasylardy qoldaý týraly suraqtar qoıyldy. Ár ótinishke jaýap berildi. Aýdan turǵyny, qoǵamdyq belsendi B.Sheralıeva kópbalaly áıelderge qoldaý kórsetý kerektigin aıtty, ol óz úıinde panasyz qalǵan analarǵa baspana uıymdastyrǵan. Mundaı bastamany qala ákimi Baqytjan Saǵyntaev qoldady, mundaı tájirıbeni belsendi azamattar arasynda taratý kerek dep atap ótti.
