Almatyda úsh mektep qosalqy nysan arqyly keńeıtilmek
ALMATY. QazAqparat- Jetisý aýdanynyń ákimi Gúlnar Kókebaeva Óńirlik kommýnıkatsııalar qyzmetiniń brıfınginde aýdandaǵy medıtsınalyq uıymdardyń, mektepter men balabaqshalardyń qurylysy týraly aıtyp berdi, dep habarlaıdy QazAqparat tilshisi.
Spıkerdiń sózinshe, «shetsiz qala» baǵdarlamasy aıasynda ár shaǵyn aýdanda bilim berý, medıtsına nysandary, belsendi demalys oryndary ashylatyn bolady.
«Búginde «Kókjıek», «Qulager» jáne «Aınabulaq» shaǵyn aýdandarynda barlyǵy 3 emhana bar. Onda 124 myń adamǵa qyzmet kórsetiledi, qalǵan 50 myń turǵynǵa shaǵyn ýchaskelerge baılanysty kórshi aýdandardyń emhanalarynda qyzmet kórsetiledi. Memlekettik emhanalardaǵy eń ótkir jetispeýshilik «Kemel» shaǵyn aýdanynda, Saıahat avtovokzaly aýdanynda jáne jumysshy poselkesi turǵyn alabynda sezilýde» - dedi Gúlnar Kókebaeva.
Osy túıtkildi máseleni sheshý úshin «Kemel» shaǵyn aýdanynda kúnine 200 kelýshige arnalǵan otbasylyq-dárigerlik ambýlatorııanyń qurylysy júrgizilýde. Sonymen qatar, Saıahat aýdanynda 1 647 sharshy metr emhana úshin ǵımarat satyp alyndy, qazirgi ýaqytta kúrdeli jóndeý jáne emhanaǵa qaıta jabdyqtaý úshin JSQ ázirlenýde. «Qulager» shaǵyn aýdanyndaǵy jalpy aýdany 1 967 sharshy metr qoldanystaǵy emhanany keńeıtý úshin úsh qabatty ǵımaratty kúrdeli jóndeýge JSQ ázirleý úshin qosymsha konkýrs jarııalanady. Aýdan ákimi oqýshy oryndarynyń tapshylyǵy máselesin sheshý týraly egjeı-tegjeıli toqtaldy. Jetisý aýdanynda 21 memlekettik mektep bar, onda 28 525 oqýshy oqıdy, jalpy jobalyq qýattylyǵy 18 381 oryn.
«Oqýshylar oryndarynyń sanyn arttyrý úshin aýdanda 1050 oryndyq úsh mektepke japsarlas qurylys aıaqtaldy. Osynyń arqasynda oqýshy oryndarynyń tapshylyǵy 1,6 myń orynǵa deıin tómendedi», - deıdi spıker. 300 oryndy №148 mektep-gımnazııasynda, 300 oryndy № 112 jalpy bilim beretin mektebinde jáne 200 oryndy № 103 mektep-gımnazııasynda qosalqy nysan salý arqyly úsh mektepti keńeıtý josparlanýda. Mektepke deıingi bilim berýge qatysty Gúlnar Kókebaeva Aınabulaq shaǵyn aýdanynda balabaqshaǵa qajettilik baıqalatynyn atap ótti. « Búgingi kúni «Aınabulaq-4» shaǵyn aýdanynda 160 oryndy balabaqsha qurylysy júrip jatyr. Ony bıylǵy jyldyń jeltoqsan aıynda aıaqtaý josparlanyp otyr. Ótken jyly Ratýshnyı kóshesinde 280 oryndyq burynǵy balabaqsha ǵımaraty satyp alyndy, ony jyl sońyna deıin ashý josparda»,- dedi ol.
