Almatyda «Úsh qońyr» bazaryndaǵy qurylys materıaldary órtendi
ALMATY. QazAqparat - Almatyda «Úsh qońyr» bazaryndaǵy qurylys materıaldary órtendi. Bul týraly jańa ǵana Almaty qalalyq TJD resmı ókili Sandýǵash Baımuhambetova habarlady.
«Búgin tańǵy saǵat 08:02-de Almaty qalalyq TJD «101» kezekshi bólimine Alataý aýdany, Soltústik aınalma joly, «Úsh qońyr» bazarynda qurylys materıaldarynyń janyp jatqany týraly habar kelip tústi. Órt sóndirýshilerdiń alǵashqy toby oqıǵa ornyna 5 mınýttan keıin, ıaǵnı 08 saǵat 07 mınýtta kelip jetip, órttiń bolyp jatqandyǵyn rastady. Qat-qabat úıilgen taqtaılardyń janýy, joǵary temperatýra jáne bir-birine tyǵyz ornalasqan qora-jaılar órtti tez sóndirýge kedergi keltirdi. Soǵan qaramastan, órt sóndirýshiler tıisti sharalar qoldanyp, tilsiz jaýdyń basqa da qurylymdar men konteınerlerge ótip ketýine jol bermedi. Órt 08 saǵat 27 mınýtta aýyzdyqtalyp, 09 saǵat 20 mınýtta sóndirildi. Órttiń aýmaǵy 400 sharshy metrdi qurady. Qurban bolǵandar men zardap shekkender joq», - dedi S. Baımuhambetova.
