Almatyda úsh aıǵa arnalǵan jumyrtqanyń shekti baǵasy belgilenedi

ALMATY. QazAqparat - Almaty ákimdigi jumyrtqaǵa ruqsat etilgen bólshek saýdadaǵy shekti baǵanyń merzimin uzartty, dep habarlaıdy QazAqparat tilshisi.

Taýyq jumyrtqasyna (1-sanat) 487 tg/on dana ruqsat etilgen bólshek saýda baǵasynyń qoldanylý merzimi kúntizbelik 30 kúnnen 90 kúnge deıin uzartyldy. Almaty ákimdigi bul sheshimdi baǵany ustap turý jónindegi qalalyq komıssııanyń usynymdary negizinde qabyldady.

Baǵalardyń saqtalýyn baqylaýdy Almaty qalasy Kásipkerlik jáne ınvestıtsııalar basqarmasynyń mamandary aýdandyq ákimdiktermen birlesip júzege asyrady. Ony saqtamaǵan ári jyl jyl ishinde qaıtalaǵandar ákimshilik jaýapkershilikke tartylyp, 100 AEK-ten (291 700 teńge) 200 AEK-ke (583 400 teńge) deıin aıyppul salynady.

Esterińizge sala keteıik, Almaty qalasynda jumyrtqaǵa shekti baǵa 2021 jyldyń 1 sáýirinen bastap engizildi. Bul sharalar naryqtaǵy ónimniń qunyn turaqtandyrý jáne satýshylardyń baǵany negizsiz kóterýine jol bermeý maqsatynda júrgiziledi.

Tıisti qaýly jarııalanǵan kúninen bastap kúshine engiziledi.