Almatyda úsh áıel boıjetkendi jezókshelikke májbúrlegen
ALMATY. QazAqparat - Almatyda úsh áıel 21 jastaǵy boıjetkendi erkinen tys jezókshelikpen aınalysýǵa májbúrlegen, dep habarlaıdy QazAqparat tilshisi.
Kúdiktiler ıntım bıznesimen aınalysyp kelgen. Olardan jábir kórgen boıjetkenniń 1999 jylǵy ekeni anyqtaldy.
«Bizge boıjetkenniń ózi kómek surap habarlasty. Ol jaldamaly páterden qashyp shyqqan. Ony erkinen tys kúshtep ustap, jezókshelikpen aınalysýǵa májbúrlegen. Kúdiktiler tez anyqtaldy. Olar 27 jastaǵy áıelder bolyp shyqty. Ekeýi páterde jas qyzdy kúzetken. Olar qamaýdaǵy qyzdy qorqytyp, ata-anańa ne istep jatqanyńdy aıtamyz degen. Qazir úsh áıeldiń ústinen QR Qylmystyq kodeksiniń 308-baby (jezókshelikpen aınalysýǵa ıtermeleý) boıynsha qylmystyq is qozǵaldy. Qylmystyq is PD Tergeý basqarmasynda tergelip jatyr», – dedi Almaty qalalyq Polıtsııa departamentiniń resmı ókili Saltanat Ázirbek.
