Almatyda úsh adamnyń ómirin qıǵan Gelendwagen júrgizýshisi bosatylǵan joq - polıtsııa

ALMATY. QazAqparat - Almaty polıtsııasy Abaı men Seıfýllın kóshesinde úsh adamdy mert qylǵan Gelendwagen júrgizýshisi Ilıas Karǵa qatysty qylmystyq is toqtatyldy degen aqparat qaýeset ekenin habarlady, dep habarlaıdy QazAqparat tilshisi.

Qalalyq Polıtsııa departamenti áleýmettik jelide taratylǵan aqparattyń shyndyqqa saı emestigin málimdedi.

«Bul aqparat shyndyqqa janaspaıdy. Ilıas Karǵa qatysty qylmystyq is áli sottyń qaraýynda jatyr. Ol ustalǵan ýaqyttan bastap qamaýda jatyr. Azamattarǵa tek resmı aqparatpen bólisýin, jalǵan aqparatty taratýǵa úles qospaýlaryn suraımyz. Shyndyqqa sáıkespeıtin qaýesetti BAQ arqyly jáne basqa da aqparattyq jeliler arqyly taratý QR QK 274-babynyń 2-bólimimen jazalanatynyn eskertemiz», - dedi qalalyq Polıtsııa departamentiniń resmı ókili, podpolkovnık Saltanat Ázirbek.

Aıta ketý kerek, qaıǵyly oqıǵa 29 jeltoqsanda bolǵan edi. Abaı men Seıfýllın kósheleriniń qıylysynda Mersedes Gelandewagen Mitsubishi Galant kóligi soqtyǵysqan bolatyn. Mersedes Gelandewagen kóligi baǵdarshamnyń qyzyl túsine ótip ketken.

Jol apatynan 3 adam: Mitsubishi Galant júrgizýshisi men eki jolaýshy kóz jumdy. Olardyń arasynda belgili aktrısa Sholpan Elgezek bar.

Keıin belgili bolǵandaı, 34 jastaǵy Gelandewagen júrgizýshisi kóligin mas kúıinde aıdaǵan.

«Mercedes Gelandewagen» markaly avtomobıl júrgizýshisi, 1985 jyly týǵan azamat K. Abaı jáne Seıfýllın dańǵyldarynyń qıylysynda jol apatyn jasaǵandyqtan, QR Qylmystyq-protsestik kodeksiniń 128-babyna sáıkes ustaldy. Tergeý barysynda júrgizýshiniń mas bolǵany anyqtaldy. Sotqa deıingi tergep-tekserýler QR Qylmystyq kodeksiniń 345-babyna jáne 347-babynyń 3-bóligine sáıkes júrgizilip jatyr», - dedi polıtsııadan.