Almatyda úsh adamdy qasaqana qaqqan kólik nómiri buǵan deıin de bir iske qatysty bolǵan
NUR-SULTAN. QazAqparat - Almatyda úsh adamdy qasaqana qaǵý isi boıynsha aıypturaǵyna qamalǵan avtokóliktiń memlekettik nómiri buǵan deıin de bir iske qatysy bar bolǵany anyqtaldy. Atap aıtqanda, 2017 jyly dál osyndaı memlekettik nómirli kólik mingen júrgizýshi esirtkige elitip kólik basqarǵany úshin ustalǵan, dep habarlaıdy QazAqparat tilshisi.
Buǵan deıin habarlaǵanymyzdaı , 26 tamyzda tańǵy saǵat 5-te Almaty qalasynyń Gagarın kóshesinde arada bolǵan janjaldan keıin bir taraptyń ókilderi óz qarsylastaryn avtomobılmen qasaqana qaǵyp, qylmys ornynan boı tasalaǵan. Vıdeo áleýmettik jelide tarady.
Almaty qalalyq densaýlyq saqtaý basqarmasy kólik qaqqan adamdardyń jaǵdaıy týraly aıtsa, polıtsııa kólikterdiń ekeýi de tabylyp, arnaıy avtoturaqqa jetkizilgenin málimdedi.
Tergeý basqarmasynyń málimetinshe, aq tústi «Toyota Camry» jáne qara tústi «Toyota Avensis» kólikteri aıǵaq retinde alynyp, QR QK-niń 24-baby 3-bóligi jáne 99-babynyń 2-bóligi boıynsha qozǵalǵan qylmystyq is materıaldaryna tirkeldi.
Aıta keterligi, 26 tamyz kúni oryn alǵan oqıǵaǵa qatysty áleýmettik jelide taraǵan. Vıdeoda jigitterdiń biriniń qolyna kóliktiń 664 AVV 02 memlekettik nómirin qolynan ustap turǵanyn kórýge bolady.
Al «Sot kabıneti» ashyq málimetter bazasynda dál osy memlekettik nómirdiń ıesine qatysty 2017 jyldyń kúz aıynda basqa is boıynsha sot qaýlysy jarııa etilgen. Ol kezde bir azamat memlekettik nómiri 664 AVV 02 «Toyota Avensis» kóligin basqaryp kele jatqan kezde jol polıtsııasy qyzmetkerleriniń qolyna túsken.
Medıtsınalyq kýálandyrý qorytyndysyna sáıkes, júrgizýshi esirtkige elitken kúıde bolǵan. Sot ony QR Ákimshilik quqyq buzýshylyq kodeksiniń 608 baby 1 tarmaǵynda (Júrgizýshiniń kólik quralyn alkogoldik, esirtkilik jáne (nemese) ýytqumarlyq masań kúıde basqarýy, sol sııaqty kólik quralyn alkogoldik, esirtkilik jáne (nemese) ýytqumarlyq masań kúıdegi adamnyń basqarýyna berý) kózdelgen ákimshilik quzýshylyqty jasaǵan dep tanyp, 3 jylǵa kólik basqarý quqyǵynan aıyrǵan.
Bir qyzyǵy atalǵan qujatta sotqa belgisiz jaǵdaıda kólik ıesiniń júrgizýshi kýáligi tárkilenbegendigi jáne onyń qaıda jatqany belgisiz ekendigi jazylǵan.
Búgin kúdiktilerdiń anasy olardyń mundaı qadamǵa ózderin qorǵaý úshin barǵanyn alǵa tartty. Kúdiktilerdiń anasy Názıra Álikeevanyń aıtýynsha, uldary Jandos pen Dinmuhamed kafege týysqandarynyń týǵan kúnine barǵan.
«Men óz uldarymdy bilemin ǵoı. Olar aq kóńil, adamgershiligi mol balalar. Árıne, jas bolǵan soń qyzý qandylyq bolar, biraq ersiz qylyq, oǵash minez kórsetken emes. Sol túni olar týǵan kúnge barǵan. Balalaryma 13 erkek ózderi kelip tıisken. Eregestiń sebebi, qyzdar bolý múmkin, biraq ol týraly anyq aıta almaımyn. Desekte, olar ózderin qorǵaǵysy kelgen. Meniń balalarym olardan baqandaı 10-15 jas kishi. Uryp soǵýdy solar bastaǵan. Eger qatty zardap shekse, jábirlenýshi bolsa, onda nege polıtsııaǵa áli aryz túsirmegen. Men aqıqatyn anyqtaýǵa bar kúshimdi salamyn»,- deıdi kúdiktilerdiń anasy Nazıra Álikeeva.
QazAqparat Nazıra Álikeevadan buǵan deıin ulynyń júrgizýshi kýáliginen aıyrylǵan ne aıyrmaǵandyǵyn surap júgingen edi. Alaıda ol advokatsyz tildesýge nıeti joq ekendigin aıtty.
Jalpy bul oqıǵa Іshki ister mınıstri Erlan Turǵymbaevqa jetip, ol oqıǵaǵa qatysty pikir bildirgen edi.
«Bul jerde birneshe bap boıynsha qarastyrylady. Birinshiden, jiktelýi boıynsha kólikti mas kúıinde júrgizý babymen qatar, buzaqylyqqa qatysty bap zerttele kele «kisi óltirýge áreket etý» babyna aýystyryldy», - dedi Erlan Turǵymbaev.
Avtory Elaman Turysbekov
