Almatyda urylar men basbuzarlar qoǵamdyq jumystarǵa jegilip jatyr
ALMATY. QazAqparat - Almatyda bas bostandyǵy shekteýli azamattar qoǵamdyq eńbekke tartylyp, kóshelerde tazalyq jumystaryn júrgizýde.
Bul 2015 jyldyń 1 qańtarynda kúshine engen Qylmystyq kodekstiń 44-babyna sáıkes júzege asyp jatyr.
Onda bas bostandyǵy shektelgen azamattar turaqty jumys orny bolmaǵan jaǵdaıda jergilikti atqarýshy organdar bekitken oryndarda jylyna 240 saǵat májbúrli eńbekke tartylýǵa mindettelgen.
Qazir Áýezov aýdany boıynsha 298 azamat shartty merzimge esepke alynǵan. Olardyń 110-y shartty merzim arqalasa, 172-si bas bostandyǵynan aıyrylǵan. Jazasyn óteý ýaqyty keıinge qaldyrylǵan 12 áıel de qoǵamdyq jumysqa tartylǵan.
Mamandardyń aıtýynsha, osyndaı jaza túri arqyly buzaqylyq pen urlyq jasaǵan azamattar eń bastysy, qoǵamnan alastatylmaı tegin emdelip, bilim alý múmkindiginen qol úzbeıdi.
«Bul atalǵan sanattaǵy azamattardy birinshiden jumysqa tartý, ekinshiden, bilim alǵysy kelse solarǵa qoldaý kórsetýge múmkindik beredi. Olar kásiptik daıyndyqtan ótip, quqyqtyq konsýltatsııa ala alady», - dedi Áýezov aýdany ákiminiń orynbasary Saıran Sáıfedenov.
