Almatyda urylar býtıkterdi tonaý kezinde ustaldy
ALMATY. QazAqparat - Almatyda býtıkterdi tonap jatqan urylar qylmys ústinde ustaldy, dep habarlaıdy QazAqparat tilshisi.
Kúdiktiler qulypty buzyp, kıim dúkenderin tonaǵan. Belgili bolǵandaı, ekeýi de buryn osyǵan uqsas qylmysy úshin birneshe ret sottalǵan.
«Olar sport kıimderi býtıkteri, áıelder aksessýarlary, sulýlyq salondary, shashtarazdar men basqa nysandarǵa kirip, tonap júrgen. Bul adamdar keńse kompıýterlerinen ish kıimge deıin urlaǵan. Qulyptardy ashý úshin olar armatýra qaıshylaryn qoldanǵan. Jedel-izdestirý is-sharalaryn júrgizý barysynda kúdiktiler qylmys ústinde ustaldy. Qazir ekeýi de Almaty qalalyq PD ýaqytsha oqshaýlaý ornyna qamaldy. Bul derek boıynsha QR QK-niń 188-baby 3-bólimi (iri kólemde jasalǵan urlyq) boıynsha sotqa deıingi tergeý júrgizilip jatyr», - dedi Almaty qalalyq PD krımınaldyq Polıtsııa basqarmasy basshysynyń mindetin atqarýshy Abzal Turǵanaly.
Ustalǵandardyń 15 qylmystyq epızodqa qatysy bary anyqtaldy.
Qazir olardyń basqa da zańsyz áreketterge qatysy bar-joǵy tekserilip jatyr.
