Almatyda «Urpaqtar umytpaıtyn Uly Jeńis» dep atalatyn merekelik shara ótedi
ALMATY. 5 mamyr. QazAqparat - Almatyda 7 mamyr kúni Abaı atyndaǵy Qazaq ulttyq pedagogıkalyq ýnıversıtetinde «Urpaqtar umytpaıtyn Uly Jeńis» degen merekelik is-shara ótkiziledi.
Ol elimizdegi tynyshtyq pen túsinistiktiń túbiri bolǵan, barsha otandastarymyz úshin asa qasterli merekege aınalǵan Uly Jeńistiń 67 jyldyǵyna arnalýda. Bul sharaǵa Abaı atyndaǵy QazUPÝ-diń soǵys, eńbek jáne tyl ardagerleri shaqyrylyp otyr. Onda estelikter aıtylyp, qalalyq máslıhat depýttaty jáne ýnıversıtet rektory, professor Serik Pirálıev ardagerlerdi quttyqtamaq. Sondaı-aq syı-sııapat kórsetilip, Qazaqstan estrada juldyzdarynyń qatysýymen kontserttik baǵdarlama usynylady. Merekelik shara odan keıin 28 gvardııashy-panfılovshylar parkindegi qaharmandar eskertkishi men máńgilik alaýǵa gúl shoǵyn qoıýǵa ulasady dep josparlanýda.
