Almatyda ýrologtardyń sezi ótip jatyr
ALMATY. Mamyrdyń 25-i. QazAqparat /Názıra Eleýhan/ - Búgin Almatyda Qazaqstan ýrologtarynyń sezi, sonymen qatar, «Eýrazııalyq ekonomıkalyq qaýymdastyqqa múshe-elderdegi erlerdiń reprodýktıvtik densaýlyǵy men demografııalyq úrdisterdiń strategııalyq máseleleri» atty II-shi Eýrazııalyq andrologııalyq kongress óz jumysyn bastady,
dep habarlaıdy QazAqparat.
Qazaqstan Respýblıkasynyń Densaýlyq saqtaý mınıstrligi, Akademık B.O. Jarbosynov atyndaǵy Ýrologııa ǵylymı ortalyǵy men Qazaqstan ýrologtary ǵylymı qoǵamdastyǵynyń uıymdastyrýymen ótip jatqan sharaǵa jaqyn jáne alys shet elderdiń jetekshi ýrologtary qatysýda.
Sezd sheńberinde Eýropalyq ýrologtar mektebiniń kýrsy jáne ýrologııalyq saladaǵy orta medıtsınalyq qyzmetkerler úshin bilim berý semınary ótedi.
«Qazaqstan ýrologtarynyń sezi jáne II Eýrazııalyq andrologııalyq kongress ýrologııa men andrologııa salasyndaǵy ǵalymdar men praktıkalyq dárigerlerdiń bilimi men tájirıbesin yqpaldastyrý úshin alań bolyp tabylady. Al, sezde talqylanatyn ýrologııalyq qyzmetti uıymdastyrý, zár shyǵarý júıesiniń ınfektsııalaryn emdeý men dıagnostıkalaýǵa qatysty jańa ádister, Qazaqstanda laparoskopııalyq ýrologııany damytý máseleleri otandyq densaýlyq saqtaý salasyn damytýǵa jáne dáriger mamandyǵynyń bedelin arttyrýǵa múmkindik beredi», dedi Ýrologııa ınstıtýty dırektorynyń orynbasary Kamaljan Nadyrov. Onyń aıtýynsha, jeke klınıkalyq sala retindegi ýrologııa, óz kezeginde jańa tehnologııalardy engizý arqyly birqatar aýrýlardyń emdeý taktıkasyn ózgertip qana qoımaı, kóptegen ýrologııalyq aýrýlarǵa qatysty emdeý-dıagnostıkalyq taktıkalardy múldem jańasha ázirlep praktıkaǵa endirgen medıtsına salasynyń jarqyn mysaly.
Uıymdastyrýshylardyń aıtýynsha, shara barysynda ótkiziletin Eýropalyq ýrologtardyń kýrsy - Qazaqstan ýrologtarynyń bilim alýy úshin biregeı múmkindik.
