Almatyda urlanǵan zatty saýdalap kelgen 7 adam ustaldy
ALMATY. QazAqparat - Almatyda «Mega Taý» saýda úıinde turǵan 7 saýdager urlanǵan zattardy satyp alýmen aınalysyp kelgen, dep habarlaıdy QazAqparat tilshisi.
Qalalyq polıtsııa departamentiniń baspasóz qyzmeti habarlaǵandaı, olardyń bireýiniń jumys ornynda 198 uıaly telefon tárkilendi. Taǵy 10 uıaly telefon kúdiktiniń avtokóliginen tabyldy. Ol óziniń úıinde 35 mobıldi qurylǵy men noýtbýkty saqtap kelgen.
Bul zattardyń ıdentıfıkatsııasy men shyǵý tegi tergeý barysynda egjeı-tegjeıli tekseriletin bolady.
7 adamnyń barlyǵynyń osy saýda úıinde saýda núkteleri bolǵan.
Tergeý kezinde kúdiktilerdiń biri kóligimen qashyp ketýge tyrysqan. Polıtsııa Jeltoqsan men Jibek joly kóshesi qıylysynda «Toıota Kamrı» avtokóliginiń jolyn kesti. Sol sátte ol jaıaý qashqan. Kúdikti polıtsııa qyzmetkerin jaraqattady.
«Ol polıtsııaǵa eki ret pyshaq suǵyp, ómirine qaýipti jara salǵan. Jaýyngerdi oqqa tózimdi kıim qutqaryp qalǵan, pyshaq boılamaı qaldy. Qaskóı qashyp ketýge qansha tyrysqanymen onyń áreketi sátsiz boldy. 27 jastaǵy jigit ýaqytsha ustaý ızolıatoryna jiberildi. Qazir oǵan qatysty QR QK 380-baby - bılik ókiline qarsy kúsh qoldaný jáne QR QK 196-baby - urlanǵan zattardy satyp alý boıynsha qylmystyq is qozǵaldy», - dedi PD Qylmystyq polıtsııa basqarmasynyń basshysy, polıtsııa podpolkovnıgi Esen Ysqaqov.
