Almatyda urlanǵan zattardy satýmen aınalysqan er adam ustaldy
ALMATY. QazAqparat - Almatyda urlanǵan zattardy satyp, aqsha taýyp kelgen er adam ustaldy, dep habarlaıdy QazAqparat tilshisi.
33 jastaǵy Túrkistan oblysynyń týmasy Almatynyń shetindegi úıinde urlanǵan zattardy qabyldap otyrǵan. Er adamnyń úıinen túrli tondar, tsıfrlyq tehnıka, gadjetter tabylǵan.
Qalalyq polıtsııa departamentiniń baspasóz qyzmeti habarlaǵandaı, sot tintý sanktsııasyna sáıkes tekserý júrgizildi. Baıdáýletovtyń úıinen 184 uıaly telefon, 154 noýtbýk, 10 netbýk, 7 teledıdar, 29 vıdeo jáne fotoapparat, 1 proektor, 6 erler sómkesi, 8 qundyz ton, 6 qolsaǵat, 26 noýtbýk sómkesi, 80 telefon qaby, 15 qýattaǵysh qural tabylǵan. Ol urylardyń ákelgen zattaryn satyp alyp, basqalarǵa qymbat baǵamen satyp otyrǵan. Máselen, netbýkterdi 7 myń teńgeden alyp, 14-15 myńǵa satqan», - dedi qalalyq polıtsııa departamentiniń basqarma basshysy Esen Ysqaqov.
Sonymen qatar, polıtsııa qyzmetkerleri osy qylmystyq tizbektiń basynda turǵan, alypsatarǵa zatyn ákelip ótkizip otyratyn qylmystyq topty áshkereledi.
Eki er adam oqý ortalyǵynan 400 myń teńgeniń zatyn alyp bara jatqan jerinen ustaldy.
«26, 31 jastaǵy jastar - Almaty men Túrkistan oblystarynyń týmalary eken. Bular munyń aldynda da qylmystyq jaýapkershilikke tartylǵan. Endi úsheýi de ýaqytsha oqshaýlaý ornyna qamaldy. Búginde olardyń 6 qylmysqa qatysy bary anyqtaldy», - dedi Ysqaqov.
Quqyq qorǵaý organdary alypsatardyń úıinen tabylǵan zattardy qylmystyq jedel málimetterdegi joǵalǵan zattarmen salystyrýdy bastap ketti.
Osyǵan baılanysty zatyn joǵaltqan adamdar 254-43-93, 8-705-212-21-21 nómirlerine habarlassa bolady.
Aıta ketý kerek, 22 qazan kúni Almatyda arnaıy profılaktıkalyq is-shara bastaldy. Aptalyq barysynda urlanǵan zattardy qabyldap, odan ári satýmen aınalysatyn qylmyskerler ustalyp jatyr. Jaqynda káriz qudyqtarynyń shoıyn qaqpaqtaryn qabyldap kelgen áıel ustalǵan edi. Munyń aldynda Almaty polıtsııasy avtobólshekterdi urlaýdy kásipke aınaldyrǵan ákki urylardyń sýretin qoǵamdyq oryndarǵa ilgen bolatyn.
Sonymen qatar, polıtsııa basqa da zańsyzdyqtardyń aldyn alý úshin vıdeo men foto salynǵan ınternet-pablıkterdi baqylaý úshin arnaıy jumys tobyn qurdy.
