Almatyda urlanǵan uıaly telefondar Qyrǵyzstan men Tájikstanǵa ketip jatyr
ASTANA. QazAqparat - Almatyda urlanǵan uıaly telefondar Qyrǵyzstan men Tájikstanǵa ketip jatyr. Bul týraly búgin Úkimettiń selektorlyq rejimdegi otyrysynda Almaty qalasynyń ákimi Baýyrjan Baıbek aıtty, dep habarlaıdy QazAqparat tilshisi.
Otyrys barysynda Premer-Mınıstr Baqytjan Saǵyntaev Almatyda uıaly telefon urlyǵy órship turǵandyǵyn aıtyp, qalalyq ishki ister departamentine urlanǵan telefon satatyn saýda núktelerine reıd júrgizýdi tapsyrǵan bolatyn.
«Jalpy urlaǵan kezde ony bul jerde satpaıdy. Ony Qyrǵyzstan men Tájikstanǵa alyp kete beredi. Sondyqtan shekarada jumystardy kúsheıtip, oǵan jol bermeý kerek. Aldaǵy ýaqytta telefondarymyz tirkelmese, qala turǵyndary ony qoldana almaıdy. Biraq, ol shetelge ketip jatyr», - dedi osy máselege qatysty sóz alǵan Almaty qalasynyń ákimi.
Jalpy ákim dereginshe, Almatyda jyl basynan beri 126 myń adam jaýapkershilikke tartylyp, 800 mln teńgege aıyppul salynǵan. Qazirgi ýaqytta atalǵan aıyppuldyń jartysy óndirip alynǵan. Osy jumystardyń nátıjesinde qylmys 8,7 paıyzǵa, onyń ishinde buzaqylyq 28, páter tonaý 14, urlyq 11, bopsalaý 6 paıyzǵa tómendegen.
«2 jyldyń ishinde 1 mlrd teńgeden astam qarajat bólindi. Polıtsııany jabdyqtaý 23 paıyzǵa artyp, 87 paıyzǵa deıin jetti. Bul respýblıka boıynsha eń joǵary kórsetkishterdiń biri. Zańǵa sáıkes, jergilikti polıtsııa ishki ister organdarynyń biryńǵaı qurylymyna kiretindikten óńir ákimdigi jedel izdestirý qyzmetine aralasa almaıdy. Jalpy ishki ister organdary aldyndaǵy mindetterdi naqtylaý aıasynda 2 jyldyń ishinde ákimdik komıssııalarynyń 21 otyrysy ótti. 4 aýdandyq ishki ister basqarmasynyń jáne jergilikti polıtsııa qyzmetiniń basshylaryn aýystyrý usynyldy. 102 qyzmetiniń jumysy jańǵyrtyldy. 35 bazarda júıeli túrde reıd júrgizildi», - dedi ol.
