Almatyda urlanǵan qymbat kólik Óskemenen tabyldy
ALMATY. QazAqparat - Almatyda avtoturaqtan urlanǵan jol talǵamaıtyn «Toyota Land Cruiser 200» kóligi tabyldy, dep habarlaıdy QazAqparat tilshisi.
Almaty qalalyq Polıtsııa departamentiniń málimetinshe, 24 tamyz kúni T.esimdi azamatsha Bostandyq aýdandyq polıtsııa basqarmasyna júgindi.
Onyń aıtýynsha, belgisiz adamdar kúıeýine tıesili «Toyota Land Cruiser 200» kóligin avtoturaqtan urlap ketken.
Atalǵan derek QR QK-niń 188-baby 4-bóligine sáıkes sotqa deıingi tergeýdiń biryńǵaı tizilimine tirkeldi.
Tergeý jáne izdestirý is-sharalarynyń barysy Іshki ister mınıstri men Almaty Polıtsııa departamenti basshylyǵynyń erekshe baqylaýyna alyndy.
«Bul qylmysty ashý maqsatynda jedel-tergeý toby quryldy. Jedel sharalardyń nátıjesinde qylmys ashyldy. Buryndary aýyr qylmys jasaǵany úshin birneshe ret sottalǵan, Shyǵys Qazaqstan oblysynyń týmasy – 34 jastaǵy T.esimdi azamat ustaldy. Onyń sybaılastarymen birge qylmysqa tyńǵylyqty daıyndalǵandyǵy anyqtaldy: olar birneshe kún boıy nazarlaryna alǵan jol talǵamaıtyn kóliktiń júrý baǵytyn qadaǵalap, urlyq jasaýǵa qolaıly jerdi tapqan. Sot sanktsııasymen kúdikti qamaýǵa alyndy», – dedi Almaty qalalyq PD Tergeý basqarmasynyń bastyǵy Muhamedáli Seısenuly.
Sonymen qatar, ol urlanǵan kólikti satyp alǵan adamnyń da anyqtalǵanyn atap ótti.
«Kúdikti urlanǵan kólikti naryqtaǵy baǵasynan úsh ese arzanǵa satyp jibergen. Urlanǵan kólik Óskemen qalasynan tabyldy. Kólik Almatyǵa jetkizildi jáne ıesine qaıtaryldy. Qazirgi ýaqytta qylmysqa basqa da qatysýshylardy anyqtaýǵa jáne olardy odan ári ustaýǵa baǵyttalǵan keshendi jedel-izdestirý sharalary júrgizilýde. Sotqa deıingi tergeý jalǵasyp jatyr», – dedi polıtsııa ókili.
