Almatyda urlanǵan káriz qaqpaqtaryn qabyldaǵan áıeldiń ústinen is qozǵaldy
ALMATY. QazAqparat - Almaty polıtsııasy káriz qudyqtarynyń urlanǵan qaqpaqtaryn qabyldaıtyn oryndardyń birin áshkereledi, dep habarlaıdy QazAqparat tilshisi.
Qalalyq Polıtsııa departamentiniń baspasóz qyzmetinen málim etkendeı, qabyldaý pýnkti Medeý aýdanynyń Jetisý kóshesinde ornalasqan. 40 jastaǵy áıel ońaı oljamen kelgen káriz qaqpaqtary men jaýyn sýy aǵatyn torlardy qabyldap kelgen.
«Atalǵan meken jaıdan 6 aryq tory tabyldy. Tárkilengen zattar kommýnaldyq menshikke qaıtaryldy. Ustalǵan azamatsha urlanǵan zatty qabyldaǵany úshin qylmystyq jaýapkershilikke tartylady. Búginde polıtsııa Almaty boıynsha urlanǵan qaqpaqtardy qabyldaıtyn basqa da núkteler týraly aqparat jınastyryp jatyr. Jaqyn arada ońaı oljamen aqsha tappaq bolǵan úlken qylmystyq top áshkerelenedi», - dedi Departamenttiń resmı ókili Saltanat Ázirbek.
Aıta ketý kerek, 22 qazan kúni Almatyda arnaıy profılaktıkalyq is-shara bastaldy. Aptalyq barysynda urlanǵan zattardy qabyldap, odan ári satýmen aınalysatyn qylmyskerler ustalyp jatyr.
Munyń aldynda polıtsııa káriz qudyqtarynyń shoıyn qaqpaqtaryn qoldy etý faktileri týraly habarlaǵan adamdarǵa syıaqy beriletinin málimdegen bolatyn.
Qalada urlanǵan nemese synǵan shoıyn qaqpaqtardyń kesirinen jol-kólik oqıǵalary jıi tirkeledi. Olardyń biri 3 sáýirde bolǵan edi.
2016 jyly synyq lıýktyń kesirinen taǵy bir jol apaty bolyp, almatylyq turǵyn Ekaterına Parafıeva eki aıaǵynan aıyryldy. Bostandyq aýdandyq sýdıasy jol apatyna aıypty dep tanylǵan avtobýs júrgizýshisiniń bas bostandyǵyn 2 jylǵa shektep, 2 mln teńge moraldyq ótemaqy tóleýge májbúrledi. Sonymen qatar, sýdıa qala ákimdigine káriz sýy lıýkteriniń qaýipsizdigin qamtamasyz etpegeni úshin jeke qaýly shyǵardy.
