Almatyda urlanǵan adamdy bosatý boıynsha arnaıy operatsııa júrgizildi
ALMATY. QazAqparat - Almaty polıtsııasy urlanǵan adamdy bosatý boıynsha arnaıy operatsııa júrgizdi, dep habarlaıdy «QazAqparat» HAA tilshisi qalalyq ІІD silteme jasap.
Almaty qalasy ІІD Uıymdasqan qylmyspen kúres basqarmasynyń qyzmetkerleri jedel-izdestirý sharalar keshenin júrgizý nátıjesinde 1987 jyly týǵan azamat Álıevti urlaýǵa qatysty bir top tulǵany anyqtady jáne ustady.
«Qaskóılerdiń óz qurbanyn ustap otyrǵan orny anyqtaldy. Ol - Almaty oblysy Eńbekshiqazaq aýdanyndaǵy kentterdiń birinde ornalasqan jeke úı. Keshe adamdy bosatý boıynsha arnaıy operatsııa sátti júrgizildi. Nátıjesinde azamat Álıev qamaýdan shyǵaryldy. Onyń ómiri men densaýlyǵyna esh qaýip tónip turǵan joq», - dep habarlady Almaty qalasy ІІD resmı ókili, polıtsııa podpolkovnıgi Saltanat Ázirbek.
Qazirgi ýaqytta úsh kúdikti ustaldy jáne QR QK 128-babyna sáıkes ýaqytsha ustaý oqshaýlaǵyshyna qamaldy. Uıymdasqan qylmyspen kúres basqarmasy atalǵan qylmysqa ózge tulǵalardyń qatysy bar-joǵyn tekserýde. Aldaǵy sotqa deıingi tergeý barysynda urlaý sebepteri men istiń ózge de jaı-japsary anyqtalady.
20 sáýir kúni polıtsııaǵa azamat S. Álıevtiń iz-túzsiz joǵalyp ketkenin aıtyp, týystary habarlasqan edi. Atalǵan fakt QR QK 125-baby, 2-bóligi boıynsha sotqa deıingi tergeýdiń biryńǵaı reestrine tirkeldi.
