Almatyda urlanǵan 18 jasar qyz úıine qaıtaryldy
ALMATY. QazAqparat - Almatyda arnaıy operatsııa barysynyń nátıjesinde 18 jastaǵy qyz aman-esen otbasyna qaıtaryldy, dep habarlaıdy QazAqparat tilshisi.
Bul týraly QR ІІM resmı ókili Almas Sádýbaev aıtty.
«Almatyda arnaıy operatsııa barysynda ІІD uıymdasqan qylmysqa qarsy kúres basqarmasynyń mamandary 18 jastaǵy qyzdy úıine qaıtardy. Qylmys 9 tamyzda bolǵan. Aldyn ala ymyralasqan belgisiz bireýler qarý kezene otyryp, qyzdyń úıine basa-kókteı kirip barǵan. Shabýyl saldarynan qyzdyń týysqany jaraqattanǵan», - dedi Almas Sadýbaev.
QR ІІM ókili habarlaǵandaı, qazir kúdikti ustaldy. Sotqa deıingi tergeý amaldary jalǵasýda.
Aıta ketý kerek, Almaty polıtsııasy birneshe kúnnen beri qalada aýqymdy reıd sharalaryn júrgizip jatyr.
Búgin «Stýdent» jáne «Atakent mall» saýda úıleri tekserildi. Onyń aldynda birneshe kún buryn birqatar avtobólshek bazary tekserilgen bolatyn.
