Almatyda Ýnıversıada-2017 boıtumarynyń túpkilikti nusqasy usynyldy
ALMATY. QazAqparat- Almatyda Ýnıversıada-2017 oıyndarynyń boıtumary - Suńqar atty qus balapanynyń túpkilikti nusqasy bekitildi.
Bul týraly búgin 12 myń oryndy Muz saraıynda ótken 28-shi qysqy Ýnıversıadany daıyndaý jáne ótkizý jónindegi Uıymdastyrý komıtetiniń kezekti otyrysynda Ýnıversıada-2017 oıyndaryn daıyndaý jáne ótkizý Dırektsııasynyń jetekshisi Naıl Nurov málimdedi. 
«Ýnıversıada-2017 oıyndarynyń jańartylǵan boıtumary -Suńqar qustyń balapanynyń túpkilikti nusqasy usynyldy. Buǵan deıingi túpnusqaǵa birqatar ulttyq elementter men alaý qosyldy. Suńqar qus - jeńiske degen jigerdi jáne maqsatkerlikti bildiredi», - dedi ol.
Budan basqa, medaldardyń dızaıny da bekitildi.
Esterińizge sala ketelik, Búkilálemdik 28-shi qysqy Ýnıversıada oıyndary Almatyda 2017 jyly 29 qańtar men 8 aqpan aralyǵynda ótkiziledi. Jarysqa 55-ten astam elden 2 myńnan astam sportshy qatysady. Básekeler 12 sport túri boıynsha 8 nysanda ótkiziledi. Barlyǵy 543 medal sarapqa salynady. Bul dúbirli dodany uıymdastyrýǵa 3 myń volonter jumyldyrylǵan jáne qalaǵa 30 myń otandyq jáne sheteldik qonaqtar keledi dep kútilýde.
Ýnıversıada nysandary qurylysynda 4200 jumys orny ashyldy jáne qazaqstandyq mazmun - 60 paıyzdy qurady. 
