Almatyda únemdelgen bıýdjet qarajatyna mektep salynady

ALMATY. QazAqparat - Almatyda jergilikti bıýdjetten jyl basynan beri 13,8 mlrd teńge únemdeldi. Bul qarajat halyqtyń az qamtylǵan tobynyń áleýmettik qajettilikterine, mektepter men bala baqshalar salýǵa, densaýlyq saqtaý men qaýipsizdikke, sonymen qatar qalany abattandyrýǵa jumsalmaq, dep habarlaıdy QazAqparat tilshisi.

Atap aıtqanda, Memleket basshysynyń kópbalaly jáne az qamtylǵan otbasylardy qoldaý sharalaryn kúsheıtý jónindegi tapsyrmasyn oryndaý maqsatynda qosymsha 2,5 mlrd teńge bólinedi. Elbasynyń tapsyrmasy boıynsha buryn negizsiz jobalardy qarjylandyrýdy ońtaılandyrý esebinen qalalyq «Baqytty otbasy» áleýmettik baǵdarlamasyn júzege asyrýǵa 3,1 mlrd teńge jumsalady.

Naýryzbaı jáne Áýezov aýdandarynda qarttardy qoldaý boıynsha eki ortalyq, Medeý aýdanynda psıhonevrologııaly aýytqýshylyǵy bar múgedek balalar emdeletin kúndizgi bólim jáne Túrksib aýdanynda psıhonevrologııaly syrqatqa ushyraǵan jandarǵa arnaıy áleýmettik qyzmet kórsetetin 360 oryndy Ortalyq ashýǵa qarjy bólindi.

Jańa bilim berý nysandary salynǵan soń qazirgi kezde mektepterde oryndardyń jetispeýshiligi 20%-ǵa, bala baqshalarda 14%-ǵa azaıdy. Degenmen, qala turǵyndarynyń sany jyl saıyn orta eseppen 50 myń adamǵa, oqýshylar sany 10-12 myńǵa, mektep jasyna deıingiler qatary 5-7 myńǵa ósip jatyr. Nátıjesinde keıbir mektepterde oqýshylar sany artyp ketken. Mamyr-5,6 yqsham aýdandarynda - 1200 oryndyq eki mektep, Nurshashqan poselkesinde - 600 oryndy mektep, Aqsaı-3a yqsham aýdanynda - 225 oryndyq mektep, al Dýman-1 eldi mekeninde 850 oryndyq qosalqy nysan salýǵa respýblıkalyq bıýdjetten 3,3 mlrd teńge bólindi. Jas qanat, Alǵabas yqsham aýdandary men Bostandyq aýdanynda salynyp jatqan úsh bala baqsha qurylysyn aıaqtaý úshin jergilikti bıýdjetten 212,6 mln teńge jumsalatyn bolady.