Almatyda úndi qyzynyń taǵdyry týraly fılm túsirildi

Qazaqfılm baspasóz qyzmetiniń habarlaýynsha, kınotýyndyǵa Hýshı Devanı atty úndi qyzynyń taǵdyry arqaý bolǵan. Súıip qosylǵan kúıeýinen qorlyq kórgen ol, Almatyǵa kelip, jumysqa ornalasyp, bıikterden kórinedi. 
 

 Esterińizge sala ketsek, byltyr Sháken Aımanov atyndaǵy «Qazaqfılm» AQ Bollıvýdtyń «Khushi Motion Pictures» atty kompanııasymen yntymaqtastyq týraly kelisimshartqa qol qoıǵan bolatyn.  Birlesken óndiris jónindegi kelisim boıynsha, eki jaq  «Love you family» tolyqmetrajdy kórkem fılminiń dıstrıbýtsııasy salasynda qyzmet etýge mindettelgen. 



 - Fılmniń Úndistandaǵy prokaty  tabysty boldy. Qazaqstanda eshqashan bolmaǵan bizdiń kórermender úshin Almaty qalasynyń ádemi kórinisterin tamashalaý qyzyqty boldy. Qazaqstannyń Mádenıet jáne sport mınıstrligine jáne mádenıet mınıstri Arystanbek Muhamedıulynyń jeke ózine senim bildirip, qoldaǵandary úshin alǵys aıtamyz. Sonymen qatar, «Qazaqfılm» kınostýdııasyna túsirilim kezinde kásibı deńgeıde kómek kórsetkenderine alǵysymyz sheksiz. Birlesip túsirgen týyndymyzdyń sátti shyqqanyna qýanyshtymyn. Meniń bilýimshe, Qazaqstanda úndi fılmderin súıip tamashalaıtyn kórermender kóp, sondyqtan da bul fılm qazaqstandyqtardyń kóńilinen shyǵady dep oılaımyn, - dedi fılmniń prodıýseri Vıpýl Devanı. 



 Úndi rejısseri Sachındr Sharm túsirgen «Týǵan úıim - tiregim» fılminiń túsirý jumystary Úndistanda jáne Taılandta ótti.  Kartınanyń negizgi qoıylymdary Qazaqstanda, aıta ketsek, Almaty qalasynyń kórikti jerlerinde túsirildi (Respýblıka alańy, «Arbat», Shymbulaq jáne Kóktóbe).
Fılmge úndiniń tanymal akterleri - Pardasanı Aksha Sýnıl, Djoshı Manoı Navanet, Salman ıÝsýf Khan, Shaktı Kapýr, Navnı Parıhar túsken. Bul kartınada qazaqstandyq tanymal akter Farhat Abdraıymov ta boı kórsetedi.   

 «Qazaqfılm» kınostýdııasynda qazaq tiline dýblıajdalǵan (orys tilinde sýbtıtrlary bar) «Týǵan úıim - tiregim» atty úndi melodramasy elimizdiń kınoteatrlarynda 14 jeltoqsannan bastap kórsetiletin bolady. 



 «Týǵan úıim - tiregim»  ( «Love you family») fılmi otbasy qundylyqtary týraly baıandaıdy. Úlgili úndi otbasynyń shańyraǵynda týǵan Hýshı esimdi boıjetken, ata-anasynyń qarsylyǵyna qaramastan,  bıden dáris beretin Radja esimdi jigitke ǵashyq bolady. Qos ǵashyq jasyryn úılenip, shańyraq kóteredi. Alaıda, kenetten bári de ózgeredi. Súıip qosylǵan kúıeýi tanymastaı ózgerip, Hýshı dalada qalady. Ýaqyt óte jaqyndarynyń qoldaýymen boıjetken Almatyǵa kelip, jumysqa ornalasyp, bıikterden kórinedi. 

 Khushi Motion Picture - 2012 jyly úndi kınogeri Bhýshan Sharma negizin qalaǵan Bollıvýdtyń iri kompanııalarynyń biri. Búginde kompanııada Úndistan kınematografııasynda tanymal jazýshylar, tehnıka mamandary, akterler men prodıýserler, rejısserler men mýzykanttar jumys isteıdi.