Almatyda «Úmit» atty derekti-kórkem fılmniń alǵashqy kórsetilimi boldy

Fılm «Shevron» kompanııasynyń jáne JQTB-ǵa, týberkýlezge jáne bezgekke qarsy kúres jónindegi ǵalamdyq qordyń qarjylanýymen, «JQTB -nyń aldyn alý jáne onymen kúres jónindegi respýblıkalyq ortalyqtyń» kómegimen jáne «AURORA» qoǵamdyq qorynyń shyǵarmashylyq ujymymen túsirilgen.

Fılmde tórt túrli oqıǵa kórsetilgen. Derekti bóliminde - kúrdeli ahýaldy basynan keshken jáne AQTQ-men ómir súretin adamdarǵa kómek kórsetýdi, áleýmettik jáne basqa máselelerdi sheshýdi óziniń ómirlik baǵyty etip tańdaǵan adamnan alynǵan suhbat bar. Sonymen qatar fılm barysynda AQTQ-ǵa shaldyqqan adam retinde úsh keıipkerdiń bastan keshken oqıǵalary baıandalady. Fılm Tasbolat Omarov, Elena Taımatova, Alekseı Kaşın, Ársen Ómirzaqov syndy kásibı akterlerdiń qatysýymen túsirilgen.

Fılmniń rejısseri Rýben Kazarıannyń aıtýynsha, ony túsirýdegi negizgi maqsat - AQTQ men JQTB indetine shaldyqqandardy qoǵamnan alastatpaı, olarǵa qol ushyn sozýǵa shaqyrý. «Mundaı qasiretke tap bolǵandar qoǵam tasasynda júrip, ózderiniń aýrýlary jaıyn jasyryp, týystaryna, jaqyndaryna aıtýdan qorqady. Onyń túbi kóptegen qıyndyqtarmen ulasyp, ózderin joǵaltyp alyp jatady. Sondyqtan osy fılm arqyly sondaı indetti juqtyrǵandar eshteńeden qymsynbaı qajetti medıtsınalyq ortalyqtarǵa tekserilip, qoǵamdaǵy óz ómirlerin jalǵastyra berýge shaqyrǵymyz keldi», -deıdi R.Kazarıan.

Ol qazirgi ýaqytta «El arna» men «KTK» arnalary bul fılmdi óz arnalarynan kórsetýge ýáde bergendigin aıtady. Sondaı-aq fılm aldaǵy ýaqytta qazaq, aǵylshyn tilderine aýdarylyp, elimizde jáne halyqaralyq aýqymda kórsetiletin bolady.

«AURORA» QQ-nyń shyǵarmashylyq ujymy on bes jyldan astam ýaqyt boıy avtorlyq, áleýmettik, bilim beretin beınefılmder men beınerolıkter shyǵarýmen aınalysyp keledi. 2009 jyly bul ujym «Ómirde óz ornyn tabý quqyǵy» jobasyn bastaǵan. Búgin osy joba aıasynda respýblıka jurtshylyǵy aldynda múgedekterge degen kózqaras jáne din tutý máselelerine túsinistikpen qaraýdy qarastyratyn «Sálemetsiz be, bul men!», jáne «Joldar» atty eki fılmdi túsirgen bolatyn.