Almatyda Ulystyń uly kúni Naýryz sherýimen bastalady

ALMATY. QazAqparat - Kún men tún ǵana emes, han men qara da teńelgen qasıetti Naýryz meıramy Almatyda «Naýryz sherýimen» bastalady, dep habarlaıdy QazAqparat tilshisi.

Almatyda Naýryzda ulttyq kıim kıgen sán-saltanaty jarasqan top kóshelermen júrip ótedi.

21 naýryzda tańerteń sherýge qatysýshylar Abaı dańǵylynyń boıynda Qazaq memlekettik tsırki aldyndaǵy alańǵa jınalyp, saǵat 10-da ulttyq kıim kıgen qatysýshylar dabyldatyp, sahnalanǵan kórinispen sherýdi bastaıdy. Arnaıy kóliktiń ústinde Qydyr Ata men Jer Ana sherýdi bastap júredi.

Sherýge Almaty qalasy mádenıet mekemeleri, ulttyq-mádenı ortalyqtar ókilderi, joǵary oqý oryndary stýdentteri men oqytýshylary, saıatshy - búrkitshiler men taz ıt baptaýshylar, qala turǵyndary barlyǵy 2myńǵa jýyq adam qatysady.

Abaı dańǵylymen kósh túzegen sherý Abylaı han dańǵylymen tómen túsedi. Syrnaılatyp, kerneıletken sándi top Qabanbaı batyr kóshesinde ońǵa burylyp, Abaı atyndaǵy Memlekettik opera jáne balet teatryna deıin sán-saltanatymen júrip ótedi.

Sonymen qatar, naýryz merekesi qarsańynda MýzART tobynyń ashyq aspan astyndaǵy kontserti ótedi. MýzArt 23 naýryzda, keshki saǵat 19:00-de «Astana» alańynda óner kórsetedi. Al 22 naýryzda qala turǵyndaryn merekelik baǵdarlama kútedi, onda Maqpal Júnisova, Mádına Sádýaqasova, Móldir Áýelbekova syndy ártister, «Renzo», «Melomen», «Aıanat», «Nazar» syndy toptar án shyrqaıdy kórsetedi.

Sondaı-aq, almatylyqtardy Túrkııadan, Ázerbaıjan men Qyrǵyz elinen keletin sheteldik mýzykalyq-bı toptary quttyqtaıdy. Sheteldik qonaqtar merekelik kóńil-kúımen bólisýmen qatar, kóktemniń kelýimen ushtasatyn shynaıy túrki merekesin merekeleýdiń óz elderine tán dástúrlerimen tanystyrady.

Jańa jyl ulttyq dástúrdegi halyq serýenderinen bastalady. Sonymen qatar, álemniń 6 elinen kelgen 170 qolóner sheberi óz ónimderin jurtr nazaryna usynyp, zergerlik qupııalarymen bólisedi.

Aıta keterligi, tórt kúnge sozylatyn mereke kúnderi qala turǵyndary men qonaqtary túrli kontsertter, jármeńkeler men festıvalderdi tamashalaı alady. Festıvalder Astana alańynda, Panfılov pen Jibek joly kóshelerinde, «Atakent» kórme kesheninde, «Almaty Arena» men «Halyq Arena» sport keshenderi mańynda, sondaı-aq «Suńqar» halyqaralyq shańǵy tramplınderi kesheninde ótedi: 22-23 naýryz - Astana alańy; 21-24 naýryz - Panfılov, Jibek joly kósheleri; 22 naýryz - Nalyk Arena muz aıdyny kesheni; 22 naýryz - «Almaty Arena» Muz saraıy; 22 naýryz - «Atakent» QІYO; 23 naýryz -«Suńqar» Halyqaralyq shańǵy tramplınderi kesheni. Sonymen qatar, bul kúnderi qalada 60 tonna kóje men baýyrsaq taratylady.