Almatyda Uly Jeńistiń 65 jyldyǵyna arnalǵan ǵylymı-teorııalyq konferentsııa ótti

ALMATY. Sáýirdiń 7-si. QazAqparat / Ádilet Musahaev / - Búgin Almaty qalasynyń ardagerler keńesi, «Nur Otan» HDP men Abaı atyndaǵy QazUPÝ birigip «Keńes halqynyń 1941-1945 jj. Uly Otan soǵysyndaǵy jeńisi jáne qazirgi kezeń» taqyrybynda ǵylymı-teorııalyq konferentsııa ótkizdi,

dep habarlaıdy QazAqparat.

Sharaǵa qatysýshylardy Almaty qalasy ákiminiń orynbasary Serik Seıdýmanov Uly Jeńistiń 65 jyldyǵymen quttyqtap, osy merekege oraı atqarylyp jatqan isterge toqtalyp, maıdan ardagerleriniń pátermen qamtamasyz etilip jatqanyn aıtyp ótti.

«2005 jyly Jeńistiń 60 jyldyǵyn toılaǵan ýaqytta kezekte turǵan barlyq ardagerlerge páter kiltin bergen bolatynbyz. Al 2005-2010 jyl aralyǵynda 281 ardager kezekke turǵan. Osy kezge deıin olardyń 123-i kezekte qalǵan bolatyn, bıylǵy Jeńis kúnine oraı olardyń barlyǵy páterge ıe bolady. Almaty qalasyna ardagerlerdiń kóptep qonys aýdarýyna baılanysty páter kezegine turý jalǵasyp keledi», deıdi S.Seıdýmanov.

Sondaı-aq ol Máskeýde ótetin sherýge úkimettiń qaýlysy boıynsha Almaty qalasynan 2 ardager, Astana qalasynan 15 adam baratyndyǵyn jetkizdi.

«Bıyl sonymen qatar Baýyrjan Momyshulynyń 110-jyldyǵy. Bıylǵy Uly Jeńis kúnin atap ótken soń 28 panfılovshylar saıabaǵynda Halyq qaharmanyna arnap eskertkish ornatylady. Oǵan memlekettik bıýdjetten 45 mıllıon teńge bólinip otyr», deıdi Serik Seıdýmanov.