Almatyda Uly Otan soǵysynyń ardagerlerin ulyqtaýǵa arnalǵan «Kóktemde ardagerler jasarady» atty merekelik shara ótti
Oǵan Uly Otan soǵysynyń ardagerleri, QR Tuńǵysh Prezıdenti qory yntymaqtasyp qyzmet atqaryp júrgen «Kazahstanskaıa pravda» gazeti atyndaǵy maıdan klýbynyń músheleri shaqyryldy.
Tuńǵysh Prezıdent qorynyń atqarýshy dırektory Bektas Muhamedjanov ardagerlerdi kele jatqan Uly Jeńis kúnimen quttyqtap, óz tilegin bildirdi.
Onyń aıtýynsha, bıylǵy jyly qor ardagerlerdiń 5 kitabyn jaryqqa shyǵarǵan. «Aldaǵy ýaqytta taǵy 5 kitapty shyǵarýdy josparlap otyrmyz. Bizdiń qor muraǵatynda kezegin kútip jatqan kóptegen materıaldar bar»,-dedi ol.
Shara barysynda ardagerler sóz sóılep, merekelik sharany uıymdastyrýshylarǵa, sonymen qatar memleket pen ákimdikke ardagerlerdi umytpaı, árqashan qoldaý, qamqor kórsetip otyratyndyqtary úshin alǵystaryn bildirip, tilekterin aıtty.
Al mektep oqýshylary, shyǵarmashylyq uıymdar, UQK Áskerı ınstıtýtynyń úrmeli orkestri, tanymal qazaqstandyq estrada juldyzdary kontsert berdi. Estrada ártisterimen birge ardagerler men qonaqtar soǵys jyldaryndaǵy súıikti ánderin eske aldy. Olardyń oryndaýynda «Qarańǵy tún», «Katıýsha», «Kók oramal» syndy ánder shyrqaldy. «Bul máńgilik ánderdiń áýenimen soǵys umytylyp, mahabbat eske tústi. Bul ánderdi tyńdap janymyz jasardy. Bul ánder jeńiske jetýge rýh bergen bolatyn»,-dedi sharaǵa qatysqan ardagerler.
Uly jeńis batyrlary úshin merekelik dastarhan da jaıyldy. Ardagerler merekelik kúnderge jetpegen bozdaqtardy eske aldy, arnaıy daıyndalǵan soldat botqasynan aýyz tıdi.
Shara barysynda barlyq Uly Otan soǵysynyń ardagerlerine Qazaqstan Respýblıkasy Tuńǵysh Prezıdenti qorynyń atynan arnaıy daıyndalǵan syılyqtar men gúlder, sonymen qatar, Darıǵa Nazarbaevanyń «Eger soǵys bolmaǵanda» kontsertiniń DVD-dıskileri tabys etildi.
