Almatyda Uly Otan soǵysynyń 65 jyldyq mereıtoıyna arnalǵan respýblıkalyq áskerı-patrıottyq ánder baıqaýy ótip jatyr

LMATY. Sáýirdiń 19-y. QazAqparat /Názıra Eleýhan/ - Búgin Almatyda Ó.A. Joldasbekov atyndaǵy Stýdentter saraıynda Uly Otan soǵysynyń 65 jyldyq mereıtoıyna arnalǵan stýdentter arasyndaǵy respýblıkalyq «Qasiretti jyldarǵa taǵzym!» atty sahnalanǵan áskerı-patrıottyq ánder baıqaýy ótip jatyr, dep habarlaıdy QazAqparat.

Atalmysh sharanyń ashylý saltanaty Uly Otan soǵysynyń ardagerlerine qurmet kórsetýmen bastaldy. Olarǵa gúl shoqtary men syı-syıapattar tabystaldy.

Baıqaýǵa respýblıka boıynsha, 12 joǵary oqý ordasynyń kórkemónerpaz ujymdary qatysýda. Olar baıqaý sharty boıynsha áskerı-patrıottyq taqyrypqa arnalǵan ánniń mazmunyn sahnalap, baqtaryn synaıdy. Elimizdiń túkpir-túkpirinen kelgen ujymdardyń ónerine T.Júrgenov atyndaǵy óner akademııasynyń professory Jan Qapesovtyń tóraǵalyǵymen, mádenıet qaıratkerleri men estrada juldyzdarynan qurylǵan qazylar alqasy tórelik etýde. Olar shyǵarmanyń kórkemdik deńgeıi men oryndalýyna, ártistik sheberligi men kórkem týyndynyń qurylymdyq tutastyǵyna, qoıylymnyń horeografııalyq sheshimin tabýǵa kóńil bóletin bolady.

«Ál-Farabı atyndaǵy Qazaq Ulttyq ýnıversıteti bul baıqaýdy birinshi ret uıymdastyryp otyr. Ondaǵy maqsatymyz - jastardyń boıynda azamattyq jáne otanshyldyq sezimderin odan ári oıatý, patrıottyq baǵyttaǵy shyǵarmalardy keńinen nasıhattap, soǵys jyldaryndaǵy áýender arqyly jastardy poezııa men án shyǵarmashylyǵyna baýlý bolyp tabylady. Búgin baıqaýda 350-den asa jastar ónerlerin pash etip jatyr», - dedi tilderdi damytý jáne tárbıe jumysy jónindegi departament basshysy Gúlnár Sársenbekova.

Baıqaý jeńimpazdary búgin anyqtalyp, arnaıy taǵaıyndalǵan dıplomdarmen jáne syılyqtarmen marapattalatyn bolady.