Almatyda «Uly Dala» Respýblıkalyq qoǵamdyq birlestiginiń quryltaıy ótip jatyr

Jıyn barysynda «Uly Dala» qozǵalysy - qoǵamymyzdaǵy demokratııalyq, lıberaldyq qundylyqtardy, adam quqyǵy men sóz, is-áreket bostandyǵy qaǵıdalaryn basshylyqqa ala otyryp, elimizdegi saıası, ekonomıkalyq, áleýmettik úrdisterge belsene aralasyp, halyqtyń búgini men keleshegine qatysty oń sheshimderge yqpal etý maqsatynda qurylǵandyǵy aıtyldy.

«Bizdiń kózdeıtin maqsatymyz- halyqtyń tutastyǵy, ekonomıkanyń, ulttyq baılyqtyń el azamattaryna jumys isteýi. Búgingi kúni elimizde ókinishke oraı kóptegen máseleler bar, mysaly ekonomıkalyq-saıası reformalardyń turalap qalýy, ekonomıkanyń monopolııalanýy, jemqorlyqtyń tyıylmaýy sekildi. Sondaı-aq biz qazir orystildi jáne qazaqtildi qoǵamda ómir súrip jatyrmyz, din máselesi de sońǵy kezde ulǵaıyp ketti. Sondyqtan eli úshin jany ashıtyn, el úshin qyzmet etetin azamattar birigip, osyndaı keleńsiz máselelermen kúrespekpiz»,-deıdi atalǵan birlestiktiń uıymdastyrý komıtetiniń múshesi, belgili saıasattanýshy Aıdos Sarym.

Sonymen qatar ol aldaǵy ýaqytta ózderiniń baǵdarlamasyn jasap, ony elimizdegi saıası partııalarǵa usynatyndyǵyn jetkizdi. "Biz eshqandaı saıası partııaǵa jatpaımyz, alaıda bizdiń usynǵan baǵdarlamamyzdy qaı partııa qabyl alyp, qoldasa sol partııany nasıhattaımyz", -dep atap ótti A.Sarym.

Jıyn barysynda «Uly Dala» Respýblıkalyq qoǵamdyq birlestiginiń eldiń ár aımaǵynda óz bólimsheleri ashylyp jatqandyǵy da aıtyldy.

Osydan úsh jyl buryn qurylǵan bul birlestiktiń búgingi quryltaıynda qoǵamdyq saıası qozǵalystyń jarǵysy men baǵdarlamasy qabyldanyp, jetekshi organdary saılanbaq.